Shillong, Kyllalyngkot 18: Ka Dorbar Iktiar Paitbah ba la khot pynlong da ka Khasi Hills Autonomous District Khasi ha madan Polo Shillong. Mynta ka sngi Saitjain da ki hajar ngut ki rangbah kur, ki nongialam seng samla, ki seng kynthei, ki synjuk bapher bapher ki ba don ha ka bri u Hynñiewtrep.
Ha kane ka la wan ban iashimbynta da u lad ka jylla u C H Vijayashankar ban long kum u kongsan, u bah Prestone Tynsong kum u symbud kongsan, u bah Titostarwell Chyne kum u nongialam ka liang pyrshah ha KHADC, ki EM incharge jong ka KHADC, ki nongialam ka synjuk ki nongshynshar shnong ka bri u Hynñiewtrep, ki nongialam ki seng longkmie seng kynthei, ki rangbah kur ba pher ba pher.
U bah Pyniaid Sing Syiem CEM ka KHADC u la ong ba kane ka dei ka sien ba nyngkong ba ka jylla ka ioh ia u Governor uba lah ban pyniajan ha ka jingiatreikam.
U la ong ba don haduh 54 tylli ki elaka bad palat san hajar tylli ki shnong ki ba hap hapoh ka jingpeit jingkhmih ka KHADC. Hapoh kine ki elaka bad ki shnong ki don ki sengkynthei seng longkmie, ki seng samla, ki seng kur.
U la pynbna ruh ia ka notifications ba la pynbna ha ki it ki hima, ki elaka kiba hapoh u pud u sam ka Khasi Hills Autonomous District Council shillong ba katkum ka Khasi Hills Autonomous District Administration of Elaka Amendment act 2023 la ithuh ne pynkupbor ia ki rangbah shnong, sordar shnong, rangbah dong,seng kynthei seng longkmie bad seng samla, ba kin don ha ki shnong bad katkum ka jingpynkup da katei ka aiñ.
Kum ka dak ka jingpynlait paitbah ia kane ka aiñ u bah Pyniaid Sing Syiem u la aiti kopi iakane ka act sha ki nongialam jong ki sengrangbah shnong, sordar shnong, rangbah dong,seng kynthei seng longkmie bad seng samla, bad u bah Pyniaid Sing Syiem u la pynbna ba naduh kane ka sngi la ithuh ne pynkupbor ia ka jingtreikam jong ki rangbah shnong, sordar shnong, rangbah dong,seng kynthei seng longkmie bad seng samla, jong baroh kiba don ha ka ri Khasi kiba hap ha u pud u sam ka KHADC.
Kumjuh ruh u la bthah ia ki sengkur kur ba katkum Khasi Hills Autonomous District Khasi Social Custom of Linage act 2023 la ithuh bad la pynkupbor ia baroh ki Dorbar ki sengkur, ki rangbah kur. Kumjuh ruh ba kin register ha ka ophis u registrar jong ka KHADC shillong.
U Lat ka Jylla u C H Vijayashankar ha ba kren ha kane ka sngi u la pynpaw ia ka jingsngew kmen ba u la ioh banshim bynta ha kane ka jingialang pynkupbor paidbah ka Dorbar Itiar Paidbah kaba pynpaw ia ka jingaiti lang ban kyntiew pynbha pynmiat ia ki shnong ki thaw.
U la ong ba Ka jingithuh kyrpang ia ka Jylla Meghalaya ka dei halor ka jingshimjait na ka Kmie, kaba long ka nongrim jong ki jaitbynriew Khasi-Jaintia bad Garo, Ka rukom ai burom ia ki kmie bad ki kynthei na ka bynta ban pynthikna ia ka jingbteng jong ki Riti Dustur ba riewspah jong ka jaitbynriew.
“Nga la sngew ba nga long uba donbok ban ioh ban ai ka jingmynjur ia kine ki artylli ki aiñ ki ba kynthup ia ka Khasi Hill Autonomous District (Administration of Elaka) Amendment Act 2023 bad ka Khasi Hill Autonomous District (Khasi Social Custom of Linage) Amendment Act 2023. Kaba long ka jingpynshisha ia ka jingpynkupbor ia ki tnat treikam ba hapoh jong ka imlang sahlang” u la ong u Lat.
U la bynrap ba “Nga kyrpad ia uwei pa uwei u nongshong shnong ban sumar bad iada ia ka pateng bad ki Riti Dustur, Ki Autonomous District Council ki long ki nongsumar ia ki Riti Dustur bad ka rukom synshar jong ngi. Ula kyntu ia ki nongialam ADC, ban iatreilang bad ka sorkar jylla ban kohnguh ia ki Riti Dustur bad ka jingkiew shaphrang kaba long kaba donkam na ka bynta ka roi ka par baroh kawei jong ka jylla”.