Shillong, Jylliew 12: Ka Synjuk ki Nongialam Shnong Mawrong Road Ri-bhoi District ka la dawa na u symbud myntri Rangbah ka jylla u bah Prestone Tynsong ban kyntiew kyrdan noh ia ka Mawrong Sub-Centre sha ka Public Health Centre.
Ia ka Synjuk ki Nongialam Shnong Mawrong Road Ri-bhoi District la ialam da u MLA ka Mawhati u bah Charles Marngar bad u la iathuh ba ka Synjuk ka long kaba la kloi ban synniang ei ka jaka, na bynta ban kyntiew kyrdan ia ka Mawrong Sub-Centre sha ka Public Health Centre.
Haba kren sha nongthoh khubor u bah Charles Marngar u la ong ba ka Mawrong Sub-Centre ka ai jingshakri ia kumba 13 tylli ki shnong bad ka Umshning CHC ka jngai kumba 17 km na Mawrong.
“Ka jingjngai ka shnong Mawrong na ka Umshning CHC ka buh jingeh ia ki paitbah khamtam ia ki longkmie ba armet ban ioh ki lad jingsumar namar kata la donkam ban kyntiew kyrdan ia ka Mawrong Sub-Centre sha ka PHC” u la ong.
U MLA ka Mawhati u la iathuh ba na ka liang u symbud myntri Rangbah u la kular ban shimkhia ia kane ka kam na ka bynta ka bha ka miat ki paidbah nong shnong ka thaiñ Mawrong.
