Shillong, Nailur 15: U Myntri ba dei peit ia ka tnad sam um jong ka jylla Meghalaya u bah Samlin Malngiang u la iathuh ba ka sorkar kala pan pisa shuh na ka North Eastern Council sa T.60 klur ban pyndep ia kane ka jingpynpur ia ki pipe um ha kane ka nongbah Shillong kaba dei jong ka Greater Shillong Water Supply Scheme phase three.
Haba kren ha ki lat pathai khubor na ka liang jong u Bah Malngiang u la ong ba lada ioh noh ia kane ka pisa na ka sorkar pdeng la lah ban pyndep ia kane ka jingpynpur ia ki paitum hapoh ka shisnem ha kane ka nongbah Shillong.
La iathuh ba na ka liang jong ki kontrktor kiba la ioh ia kane ka jingtrei mynta kila pynpaw ba kim treh shuh ban trei ha ka dor barim na mar la kiew dor lut ki tiar ki tar baroh namar ka dor kaba la ai ha ki ka long jong u snem 2008 bad mynta kala poi sha ka 2020.
Haba ia dei bad kane la bthah ia u Chief Engineer jong ka PHE ban ia kren bad ki kontraktor ba kin dang sdang noh ia ka kam bad ha ka juh ka por ban pynkhreh ia ka dor kaba thymmai kaba dei kaba mynta. Haba ia dei bad kane na ka liang jong ki kontraktor ki kwah ban ioh da ka jingthoh.
La iathuh ba ha kane ka jingleit jong u myntri rangbah ka jylla u Conrad K Sangma sha Delhi ha kine ki sngi la ia kren ia kane ka kam bad ka sorkar pdeng bad khmih lynti ban ioh ia kane ka jingpan pisa na ka NEC ban ioh pyndep noh ia kane ka jingtrei.
Kane ka skhim JNURM ka dei kaba la bei pisa da ka sorkar pdeng ha ka jingiabhah ba ka sorkar pdeng kan bei 90% na ka jinglut bad ka sorkar jylla kan sei 10% ha kaba ia dei bad kane ka GSWS-III.
