Shillong, Lber 12: U Myntri ba de peit ia ka tnad pule puthi u Rakkam A Sangma haba jubab ia ka jingkylli jong u bah H S Kharpran bad u bah Brightstarwell Marbaniang la ong ba ka sorkar kala sdang ia ki skul Eklavya Model Residential School (EMRS).
Ka sorkar kala phah saw tylli ki skim sha ka sorkar pdeng ban sdang ia ki skul Centre of Excellence for Sport, haduh mynta ka sorkar pdeng kam pat pdiang ia kine ki jingpan ka sorkar jylla, ia mynta ki don 38 tylli ki EMRS skul kiba la mang pisa da ka sorkar pdeng.
Haba jubab ia ki jingkylli bynrap u myntri la ong ba na ki 38 tylli ki EMRS skul kiba la sdang ban shna, ha ki san tylli ki Block ym pat lah ban ioh ia ka jaka, kito ki long ka Laitkroh Block, Mawryngkneng Block, Mylliem Block, Umsning Block bad ka Laskein Block.
Ka jingtrei ia kine ki skul ka dang long ha pdeng 20% bad 60%, kiba la lah ban pyndep dei tang kaba ha Samanda Block bad Umling Block ha Pahamsyiem, kaba sah mynta ka long ba ka sorkar pdeng kan phah noh ia ki nonghikai ban sdang ia kine ki ar tylli ki EMRS skul.
