Shillong, Nailar 30: Ka thmu ban shna ia ka surok na Nongstoin sha Kyrshai ban pyniasoh sha jan Mirja ha Assam ka dei kaba la slem bha bad mynta ka ophis jong u Deputy Commissioner jong ka West Khasi Hills District kala dep ban jurip ia ki jaka ban shim ban shna ia kane ka surok.
U Deputy Commissioner jong ka West Khasi Hills District bah T Lyngwa u la iathuh ban na ka liang jong ka ophis kala dep ban pynbiang ia ki jingthew jingwoh baroh ha kaba ia dei bad ki jaka ban shim ban shna ia ka surok na Nongstoin sha Kyrshai ban pyniasoh sha Assam.
Ka ophis kala dep ban phah ia ka jignthoh sha ka sorkar jylla na ka bynta ban siew ia ka bai khydnew, kumba ka long mynta ka sorkar kam pat phah ia ka pisa, la ong ba mar ia phah ka sorkar ia ka pisa ka ophis kan siew noh ia ka pisa sha ki trai jaka ban sdang trei ia kane ka surok.
Ka jingthmu ban shna ia kane ka surok ka long ban pyniasoh ia ka Nongstoin kaba ei ka nongbah jong ka West Khasi Hills District bad ka Assam, namar kumba ka long mynta ban leit sha Assam hap ban kiew sha Mairang lane hap hiar sha Raingdo, kane ka surok kan pynsuk ia ki paidbah ha ka ia leit ia wan na Nongstoin sha Assam.
