Pdiang ka cabinet ia ka rai ban thung kam 290 ngut ha ki 9 tylli ki kolej ha ka jylla: Prestone

Shillong, rymphang 04: Ka jingialang jong ka Kabinet kaba la long mynta ka sngi ha Jowai kala pdiang ia ka rai ban thung kam 290 ngut hapoh ki khyndai tylli ki Kolej hapoh ka jylla Meghalaya, ia kine ki kolej mynshuwa la tip kum ki Community College hynrei mytna la pynkylla sha ka people’s College.

Kitei ki 290 tylli ki kam kin long ha kine ki kolkej, Nongstoin College 43, Ri Bhoi College 31, Shangpung College 26, Tirotsing Memorial College Mairang 26, Jaintia Eastern College Khliehriat 31, Tura Chriatian College Tura 32, Chokpot College Chokpot 28, Ampati College Ampati 33 bad ka Natalang College 40. Kine ki kam ki kyntup ia ki nonghikai bad ia ki ban trei ha ophis.

U Bah Lahkmen Rymbui myntri ba dei peit ia ka tnad pule puthi jong ka jylla u la ong ba kine ki kam kiba la dep ban pdiang da ka kabinet ka long na ka bynta ka jingpule ia ka Arts Stream. La ong ba ka sorkar kan hap ban bei pisa T.16.12 klur ha ka shisnem kaba ka sorkar kan pynlut.

U symbut myntri rangbah ka jylla u bah Prestone Tynsong u la ong ba wat la ka sorkar ka don ha pdeng ka jingduna pisa hynrei na ka bynta ka jingmyntoi jong ki paidbah ka sorkar kala shim ia kane ka rai khamtam eh ban pyn ioh ia ka jingmyntoi jong ki paidbah ha ki nongkyndong.

Ka tnad kam poh iing kala wanrah hapoh jong ka kabinet ia ka “Meghalaya Private Security Agencies Private Security to Cash Transportation Activities Rule” kane ka dei ka ain jong ka sorkar pdeng ia kaba ka sorkar jylla kan hap ban shna ia ki kyndon.

Na ka liang jong ka tnad ka kit ka bah kala wanrah ia ka phang ia kren ba dei ban ai lad ia ki kali ar shaka ba kin kamai da kaba ailad ia ki ba kin ioh ia ka jingbit da kaba shim laisen ia kaba la pdiang ruh da ka cabinet.

Ka tnad jngohkai pyrthei kala ia soi ia ka jingiatehkular bad ka AirBnB na ka bynta ban pynshlur shuh shuh ban buh ia ki iing basa kiba la tip kum ki “Home Stay”. Na ka liang jong ka tnad pynroi sor ruh kala wanrah ia ka Meghalaya Real Estate Regulation and Development General Rules 2020 ia kaba la pdiang da ka Kabinet mynta ka sngi ha kane ka jingialang.