Shillong, Naitung 08: Ka iing dorbar jong ka Khasi Hills Autonomous District Council mynta ka sngi kala pdiang ia ka Khasi Hills Autonomous District (Khasi Social Custom of Clan Administration) Bill, 2018. Ia kane ka Bill la wan rah biang hapoh ka iing dorbar da u CEM bah Titosstarwell Chyne.
Ka jingthmu jogn kane ka Bill ka long ban pynlong ain ia ka rukom khien kur hapdeng ki khasi da kaba shim ia ka jaid na ka kmie, namar ka bynta kaba 3(1) jong ka bynta kaba 4 bad 5 jong ka Sixth Schedule ka Riti synshar jong ka Ri India kala ai bor ia ka Khasi Hills Autonomous District Council ban shna ain halor ki riti dustur.
Ka Artikil 12 bad 29(1) jong ka Riti Syshar jong ka Ri India kala ai bor pynneh pynsah ia ki riti dustur kiba don ia kiba la but ryntih da kiba bun kum ka jaidbynriew khasi, kane ka long da ka jingthmu ban iada, ban pynneh pynsah bad ba kan dang kiew dang heh dang san.
Dei halor kane kitei ki nongrim ka KHADC kala pyndon kam ia ka bor kumba la pynkup ha ka ban wan rah ia kane ka Bill, ban ioh ia ka jignthuh ia ka rukom khein kur hapdeng ka jaidbynriew khasi kaba shim jaid na ka kmie.
Ia kane ka Bill la wanrah ha iing dorbar jong ka KHADC ha ka 20th Naiwieng 2018 bad la pdiang ia ka ha ka 22th Naiwieng 2018 ha ka por ba u bah HS Shylla bam kwai dwr u blei u long u CEM jong ka KHADC, ia kane ka Bill la phah sha u Lat ka jylla hynrei la pynphia biang ryngkat ki jingkdew.
U bah Tisosstarwell Chyne haba u la wan ban shimti kum u CEM jong ka KHADC u la thaw ia ka Committee ban peit bniah ia kane bad ha dien ka jignaikren bad bishar bniah la ai ia ka kaiphot sha u CEM da u shongknor u Bah Bindo M Lanong ba khlieh ia ka kommittee bad la wan rah biang ia kane ka Bill ha ing dorbar ha ka 6th Naitung 2022 bad la pdiang mynta ka sngi 8th Naitung 2022.
