Shillong, Kyllalyngkot 17: U Myntri Rangbah ka jylla u Conrad K Sangma la ong ba ka jingia kynduh ka kabinet mynta ka sngi ka long ban pynkiew ia ka jingsiew ka sorkar “Contingency Found” kiba khlem da iohi lynpa . Ka jingthmu jong kane ka long ba ka pisa ka don ban pyndon kam hynrei kam shyn rung ha ka jingmang tyngka.
U mytnri rangbah la ong ba kaei kaba la don ha mang tyngka, hynrei kaei kaba kila pynlut ka long palat ia ka mang tyngka, kumta ki hap ban pan pisa shuh napoh ka iing dorbar bad lada kam don lynti ki hap ban leit sha ka jingsiew ka sorkar.
Ka jingmut kane ka long ban lah ban pynlut ia ka pisa kaba don wat la khlemdon ha ka mang tyngka da kaba pynkiew ia ka jingsiew ka sorkar kumba ka long mynta ki ioh ka pisa T.100 klur na ka sorkar pdeng na ka bynta ka NERGS bad kumba ka long la dep ban pyndon kam ia ka pisa kaba don ha ka mang tyngka.
Ban lah ban pyndon kam ia kane ka pisa don kam ban kyntiew ia ka jingsiew ka sorkar bad mynta ki hap ban kyrshan ruh ia ka MeECL ha kaba ka sorkar kala ai pisa T.400 klur ia ka MeECL ban kyrshan ia ka bad ka pisa ka don ban ai shuh sha ka MeECL hynrei kam don ha ka jingmang tyngka.
Kumta ka kabinet kala shim ia kane ka rai ban pynkiew ia ka jingsiew ka sorkar khnang ban lah ban pyndon kam ia ka pisa kaba don bad kane ka jingpynkiew ka long na ka T.1300 klur sha ka T.1800 klur tyngka na ka bynta kane ka snem mang tyngka 2022-2023.
Ha ka jingshisha ia kane la dei ban wanrah ha ka dur jong ka jingpan pisa shuh na ka iing dorbar hynrei namar ba kam don shuh ka jingiashogn dorbar kumta la hap ban pynkiew ia ka jingpyndon kam ia ka pisa kaba ka rule ka shah.
