Shillong Nailur 07: Mynta ka sngi ka Kabinet kala ai ia ka jingmynjur ban pyntrei kam ia ka Code of Criminal Procedure (CrPC) bad ka Code of Civil Procedure (CPC) ha kane ka jylla.
Haba kren sha ki lad pathai khubor u Myntri Rangbah ka jylla u Conrad K. Sangma u la ong ba hadien ba ki la iakren sani bad ki nongialam ka District Council, ka sorkar ka la pynbna ba kan pyntreikam ia ka CrPC bad ka CPC ha kane ka jylla bad u la pynshai ba ki Iingbishar jong ka District Council kin bteng ia ka bor treikam jong ki katkum ka kyndon ba la don hapoh ka paragraph 4 bad 5 jong ka Sixth Schedule ha ka riti synshar ka ri India.
U Myntri Rangbah ka jylla u la ong ba ia kane ka rai la shim ban pyntrei kam ia ka CrPC bad ka CPC ha baroh kawei ka jylla, hadien ba la pyniakhlad ia ka bor ka Iing Kashari na ka bor sorkar katkum ka sub-section (2) jong ka Section 1 jong ka Code of Criminal Procedure 1973.
U Myntri Rangbah ka jylla la ong ba baroh ki Iing bishar jong ka District Council Court kin iai bteng ia ka bor katkum ba la bsuh hapoh ka paragraph 4 bad 5 jong ka Sixth Schedule ha ka riti synshar ka ri India.
U la ong ruh ba u Lat ka jylla u la bthah ba baroh ki kam ba la leh ki Kashari ka District Council katkum ka Rules ka Administration of Justice bad Police ha Khasi-Jaintia Hills 1937 bad ha Garo Hills kin hap hapoh ka kyndon ka Code of Criminal Procedure, 1973 bad kumjuh ka Code of Civil Procedure 1908.
