Shillong, Nohprah 17: Mynta ka sngi ha ka jingiashong jong ka Kabinet kala pdiang ia ka rai ban pyntrei kam ia ka Inner Line Permit hapoh jong ka jylla Meghalaya hapoh jong ka Bengal Eastern Frontier Regulations 1873.
Haba kren ha ki lad pathai khubor ha dien ka jingialang na ka liang jong u myntri rangbah ka jylla u la ong ba ia kane ka rai jong ka Kabinet kin sa rah ha ka dorbar ba kyrpang ka ban long la sngi palei ka 19/12/2019.
Ha kane ka jingialang ka cabinet kala shim ruh ia ka rai ban pynjlan shuh sa ar snem ka jingtrei kam jong u Colonel Gautam Kumar Rai kum u Director jong ka Sainik Welfare Board na ka bynta ki ar snem ki ban dang wan.
Kawei pat ka mat ia kren kaba ka cabinet kala pdiang ka long ha kaba ia dei bad ki kyndon na ka bynta ban pyndon kam ia ka pisa kaba la ioh na ka “Meghalaya Environment Protection and Restoration Fund”.
Na kane ka MEPRF ka jylla Meghalaya kala ioh ban lum ha duh T.450 klur bad na kane la ai sha ka National Polution Control Board T.100/- klur bad ia kane ka pisa mynta yn pyndon kam ha kito ki jaka kiba la shah pynjlur ha ka jigntih dewiong ha kane ka jylla da kaba thung dieng.
