Shillong, Naitung 12: U MLA jong ka Mawsynram Constituency u Bah Himalaya Shangpliang mynta ka sngi u la phah da ka shithi sha ka Deputy Commissioner jong ka East Khasi Hills District ka kong Matsiewdor War Nongbri ban kyntu ia ki bor jong ka District ban pynpoi ia ki mar bam sha ki thain Hatmadon namar ba ki marbam ha katei ka thain kila sdang duna.
Haba kren ha u SP News Agency u Bah Himalaya u la iathuh ba ia kane ka shithi sha ka Deputy Commissioner u la phah mynta ka sngi ban pyntip sha ki bor jong ka District ba na ka daw jong ka jingtwa ki surok ki kali kim lah shuh ban leit sha katei ka thain bad mynta kala dong ha pdeng ka jingkyrduh bam.
Ki jaka kiba la shah ktah eh mynta ka long ki shnong kiba don ha pdeng ka Ryngkut bad ha Dangar bad kumjuh ka thain Hatmawdon. Na kadaw jong ka jingtwa surok ki shnong kiba don ha pdeng kitei ki thain kila shem jingeh mynta ban ioh ia ki marbam, kum u khaw, shini, mluh, phan, u dai bad kiwei ki jingdon kam.
Na ka liang jong u MLA ka Mawsynram u ka kyntu ia ka Deputy Commissioner ba kan phah ia ki jingbam sha katei ka thain ha ki shnong kiba la shah ktah. Ha ka juh ka por na ka liang jong u MLA u la kyntu ia ka DC ban ai jingtip lem sha u kaei kaba ki bor jong ka District kin leh.
