Shillong, Jymmang 5: Ka Central Executive Committee ka KSUka pynpaw ia ka jingkyndit kumba iuh tdong bsein mar ia ioh jingtip ia ka jingkhlad kynsan u bah Rishot Skhembor Kharbani ha ka 03 tarik u Jymmang 2021, u ba dei u General Secretary jong ka KSU West Khasi Hills District Unit.
Na ka liang ka seng kmie ngi pynpaw ia ka jingsngewsih kaba kthang shikatdei eh halor ka jingleit kloi noh une u samla Rangbah uba long u rishot ym tang ia la ka iing ka sem lane ka shnong ka thaw, hynrei kumjuh ruh ia ka Ri bad ka jaidbynriew Khasi baroh kawei.
U tei u samla u la aiti ia lade bad ka jinglen lade ki jong u bad ki jingnoh synniang ki jong u na ka bynta ka bha ka miat bad ka shnong shngain ka Jaidbynriew ha la bor bad ka iktiar ka jong u lyngba ka KSU.
Kum ban shu kyrtiang sha ki por ba la leit, ka KSU ka la ioh ban pdiang nyngkong eh ia u samla Rishot ha kaba u la wan pyniasoh bad ka seng ha u snem 2005 lyngba ka KSU Mawiawet Unit ha kaba u la bat kum u General Secretary.
Lyngba ka jingtrei shitom ka jong bad ka mynsiem shakri ia ka Jaidbynriew kaba u la pyni nuksa ia kiwei, ka KSU Nongstoin Circle ka la ibit ia u ban long kum u General Secretary kane ka Circle.
Dei ha u snem 2015 la kyntiew ia u sha ka District Unit bad la pynkhamti ia u ban peit ia ki kam ka seng kum u Finance Secretary ka KSU WKHDU haduh u 2018. Ka jingskhem nongrim ka jong une u samla, ka la pynlong ia baroh ki tnad treikam ka KSU WKHDU ban ibit ia u ban khamti noh kum u General Secretary ka District Unit naduh u 2019.
Ka seng kan nym lah ban jer bad thoh lut ia baroh ki kam kiba u la don bynta bad noh synniang ha ka jingshakri ia ka Jaidbynriew, hynrei kum ki nongialam ka CEC ngi kwah ban pynpaw ba u la pyndep ia la ka kamram kum u khun dapshynrang ka Jaidbynriew tad haduh ki sngi kiba khatduh ki jong u.
kumba ju long hi ruh kumba ka seng kam ju hikai ban put turoi bad thap met ia lade, u samla Rishot u la bud ia kane ka jinghikai bad trei met bad mynsiem khlem da wad ia ka nam lane ka burom.
Ka KSU CEC ka pynpaw ia ka jingsngew tmang haba ym baroh ki nongialam ki la ioh bynta ban leh burom khatduh ia i hynrei tang katto katne ngut kiba kynthup ia i President, bah Lambok Starwell Marngar, bah Rapborlang Nongrum (Assistant Finance Secretary), bah James Hitler Mawphniang (Assistant General Secretary) bad bah Spaindarsing Lyngkhoi (Office Secretary) lem bad ki nongialam bad dkhot ka KSU WKHDU.
Ka daw ka long ba namar ba ka don ka jingteh jingkhum ha ka leit ka wan namar kane ka khlam. Kyntang iawai, ka CEC jong ka KSU lem bad ka KSU hi baroh kawei ka phah ia ka jingsngewlem sha phi baroh ki bahaiing hasem u bah Rishot, bad ka seng ka kular ba kan iai don ryngkat bad phi ym tang ha kane ka khyllipmat hynrei ha kano kano ka por haba ka kam ka dawa.
