Shillong, Iaiong 21: U Myntri Rangbah ka jylla u Conrad K Sangma u la phah ia ka khubor sngewlem halor ka jingkhlad u kpa bakhuid u Pope Francis lyngba u Archbishop Leopoldo Girelli, Apostolic Nuncio sha India, 50-C Niti Marg, Chanakyapuri, New Delhi,
Ha kane ka khubor sngewlem u myntri rangbah ka jylla u la ong ba u Pope Francis dei u “Pope jong ki Paidbah” bad u la long shisha kum u nongialam mynsiem ha kane ka juk kaba mynta ym tang ha Vatican hynrei sha bar jong ka Vatican ruh kum juh.
U Kpa bakhuid u long shisha u nongrah ktien ban pynneh pynsah ia ka mariang, ban kren na ka bynta kiba duk ba kyrduh, ki poiwir bad na ka bynta kito kiba sha lehbein bym hok ba dei ban burom ia ki.
U Kpa bakhuid u kren shai na ka bynta ban pynneh pynsah ia ka shong suk shongsain ha baroh kawei ka pyrthei bad ha baroh ki jaidbynriew khlem da khien kano kano ka niam ba dei ban don ka jingsuk kane kaba u kpa bakhuid u angnud.
U myntri rangbah ka jylla, ha ka kyrteng jong ki paidbah nongshong shnong ka jylla Meghalaya u phah ia kane ka khubor sngewlem bad dwai ba ai ka mynsiem jong u kpa bakhuid kan ioh ia ka jaka shongthiat ha bneng.
U President ka Catholic Association Shillong u Bah Vincent H Pala la phah ia ka shithi sha u Archbishop kane ka jylla niam ban phah ia ka khubor sngewlem halor ka jingkhlad noh u kpa bakhuid Pope Francis.
