Plie lat ka DoNER ban seng ia ki jaka pynmih Oxygen ha ki jylla NE: Dr Jitendra

The Minister of State for Development of North Eastern Region (I/C), Prime Minister’s Office, Personnel, Public Grievances & Pensions, Atomic Energy and Space, Dr. Jitendra Singh addressing a webinar on “Act East Policy”, organised by the ICRIER, in Guwahati on March 20, 2021.

New Delhi, Jymmang 3: U Myntri Khynnah jong ka Sorkar Pdeng ba dei peit ia ka Tnat Development of North Eastern Region (DoNER),  u Dr Jitendra Singh mynta ka sngi u la ong ba ka Tnat DoNER ka la shim ia ki sienjam ban pynkhlain shuh shuh ia ki jingdon jingem ba iadei bad ka COVID kynthup ruh ia ki jaka pynmih oxygen ha baroh ki jylla ka thain shatei lammihngi.

Ha ka jingialang peit bniah ba la pynlong mynta ka sngi, la pyntip ba la sdang ia ka jaka pynmih oxygen ha Tawang ha Arunachal Pradesh da ka jingbei tyngka na ka Tnat bad ki sienjam ki dang iaid shakhmat ban plié shuh shuh ia kine ki jaka pynmih oxygen ha ki jaka nongkyndong jong kiwei kiwei ki Jylla. Ka Tnat ka pyrkhat ruh ia ka jingtyrwa jong ka Sorkar Arunachal na ka bynta san tylli ki kali oxygen ha ka jinglut kaba 5 klur tyngka.

U Dr. Jitendra Singh u la pynpaw ka jingsngewhun ba ka united fund kaba T. 25 klur ba la ai sha ki jylla ka thain shatei lammihngi ha u bnai Lber ba ladep na ka bynta ka jingbei tyngka ban iakhun ia ka jingpur ka khlam COVID-19 ka la long ka jingmyntoi ia kiba bun ki jylla ban thied ia ki tiar ba donkam ha ka kam ai jingsumar ha kiba bun ki hospital.

U la bynrap ruh ba kam don kano kano ka jingduna oxygen ha kano kano ka jylla jong ka thain shatei lammihngi bad don katto katne na ki, kiba dang pahuh ki tiar namar ka jingpynpoi tiar ha ka por ha u snem ba ladep.

Nalor kane, u Myntri DoNER u la pynkynmaw ruh ba ha u snem ba ladep ha ki por ba sdang ia ka jingpakhang dam ba nyngkong, ka Tnat Development of North Eastern Region (DoNER) ka la sdang lypa ia ka kam da kaba buh lypa T. 25 klur ban pyndonkam ki jylla ka thain shatei lam mihngi na ka bynta ki jingpynkhreh ban iakhun ia kane ka khlam, watla ha kato ka por ki jylla ka thain shatei lammihngi kim pat da shah ktah haduh katta bad bun ki Jylla kum ka Sikkim bad Manipur kilong kiba lait na ka khlam Corona.

U la ong, Ka tnat Development of North Eastern Region (DoNER), nalor ka jingsdang ia ki kam ba iadei bad ki jingdon jingem, ka ai jingiarap ruh ia ki jylla ka thain shatei lammihngi ha ki jingjia shah lynshop ha ki bor mariang.

U la kdew ia ka nuksa jong ka jingjia khynniuh jumai ha Assam bad Arunachal Pradesh ha u snem ba ladep bad ka Tnat DoNER mar mar ka la shim ia ka jingkitkhlieh ban iatreilang hapdeng ki Sorkar jylla bad ka Sorkar pdeng, wat hapdeng ba bun ki ophisar jong ka Tnat Sorkar Pdeng ki la shah ktah ha ka jingpang COVID bad ma u ruh ialade u shah sumar ha hospital namar ka COVID.

U Myntri u la pynpaw ka jingkmen haba u la ioh jingtip ba ha ki arsnem kynthih, la pynlut 100 percent ka pisa ba la mang da ka Tnat DoNER na ka bynta ka snem mang tyngka ba mynta hashuwa ban kut ka snem mang tyngka.

U Dr. Jitendra Singh u la pynkynmaw ruh ba shen hadien ba la pynbna ia ka jingpakhang dam ha u bnai Lber, 2020, la shim ia ka rai halor ka jingtuklar u Myntri Rangbah duh, u Narendra Modi ba ki liengsuin ba kit ia ki mar ba kongsan kin treikam kyrpang ha ka thain shatei lammihngi kumjuh ruh ha kiwei kiwei ki thain ba kynthup ia ki Union Territory jong ka Jammu & Kashmir bad Ladakh, bad ki Island territory.

U Myntri u la bynrap ba ha kane ka kynti ruh la shim baroh ki sienjam ban iarap ia ki jylla ka thain shatei lammihngi halor ka nongrim ba kyrpang.

U Dr. Jitendra Singh u la ong ba u ju iakren man ka por bad baroh ki jylla ka thain shatei lammihngi na ka bynta kino kino ki jingdonkam bad u la pyntip ba ka Tnat ka sdang ia ki kam ai jingiarap ha ka jingjia khynniuh jumai ba dang shen ha Assam.

 

What Next?

Recent Articles

Leave a Reply

Submit Comment

*