Shillong, Jymmang 14: U Myntri ba dei peit ia ka tnad ka koit ka khiah u bah Alexander L Hek mynta ka sngi u la plie ia ka jaka ai jingsumar lada don kiba pang COVID-19 hapoh ka ktem jong ki shipai 67. Bn jong ki pulit CRPF ha Polo, ha kane ka sngi la plie ruh ia ka kor pynmih Oxygen kaba la ai sngewbha da ka Rotary Club Shillong.
Haba kren ha kane ka jingialang kaba lyngkot u myntri ka tnad ka koit ka khiah u la ai khublei ia ki Pulit CRPF kiba la lah ban sdang saw tylli ki jingthiah ban buh ia kiba pang COVID-19 lada ki don kiba shitom bad ka long kaba sngew tynnad ba kin dang pynbun shuh ia ki jaka ai jingsumar ha kane ka jaka bad kane kam dei ruh tang na ka bynta ki jong ki hynrei wat ia ki paidbah ruh.
Ha kane ka jingialang la pyntip ruh ba lyngba ka jingiatrei lang bad ka Rotary Club Shillong labuh ar tylli ki jaka ai jingsumar lada don kiba pang COVID-19 hapoh Konstitwnesi, kawei ka St Jospeh School Pynthorbah bad kawei ha Nongmynsong kine kin don mar 25 san tylli ki jingthiah.
La ong ba kine ki jaka sumar kin long tang ia kito ki briew kiba wan na ki long iing kiba duk ba lada ki don kiba shitom kin nym lah ban sah lang ha ki iing namar ka jingiabun briew bad ki kyndon ka tnad ka koit ka khiah ruh kan nym shah ia ki ban sah lang.
Ha kane ka sngi la pynbna ruh ba ka kynhun Suraksha Group na Kolkatta kan wan sha Meghalaya ban iarap ia ka tnad ka koit ka khiah ha Meghalaya ban test 1000 tylli ha ka sngi sngi, kane ka long ba kane ka kynhun kan leh hi da lade bad ki briew ruh kin dei na kane ka kynhun.
Haba kren ha kane ka jingaiti ia kane kan kor pynmih Oxygen, ka President jong ka Rotary Club Shillong ka A. Paul kala ong ba kum ka seng trei man sngewbha kin ia leh katba lah ban iarap ia ki paidbah bad kane kila leh ha kylleng ba pyrthei bad kum ka kynhun kin iarap ia ki paidbah ha kane ka jylla ruh kum kum juh.
Kala iathuh ba kum ka kynhun kala don ka jingiamir jingmut kumno ban iarap ia ki paidbah ha kane ka por ba don kam kyrkieh bad kila shem ba ha kane ka por don kam ia ki kor pynmih Oxygent, bad kane ka kor pynmih Oxygen kaba la aiti mynta ka sngi sha ki pulit CRPF lyngba ka Rotary Club Shillong ka dei kaba la noh syniang da u dkhot ka seng u Kailash Verma.
Ha kane ka sngi ia ka jingkren pdiang sngewbha ia kiba la ia poi ha kane ka jingialang ban plie ia kane ka jaka pynmih Oxygen la kren da u Commandant jong ka kynhun pulit CRPF kaba 67- Bn u Alok Bhatachejee. Ha ka jingkren jong u la ong ba baroh ki CRPF kila dep ai Tika 100% bad mynta ki ai ka jingiarap ki paibah kiba don saw dong jong ki.
