Shillong, Nohprah 21: U Symbut Myntri Rangbah ka jylla u bah Prestone Tynsong mynta ka sngi u la plie ia ka khyrdop ba nyngkong ha ka jylla, ka jaka rung jaka mih ha Umling ha Ri Bhoi District, ha ka jingiadonlang ryngkat u myntri kam pynroi nongkyndong u bah Hamletson Dohling.
Kane ka long ka khyrdop kaba nyngkong eh ha ka jylla ia kaba la pyntrei kam da kane ka sorkar MDA ia kaba la pruid dak ha ka Meghalaya Residence Safety Security Act, 2016 katkum kane ka ain ka long ba ki briew kiba rung sha ka jylla Meghalaya kin hap ban kyntiew kyrteng ha kane ka jaka.
Ka jingmih kane ka khyrdop ka long ha dien ba ki seng bhalang ka jylla ha u snem 2013 kila ia khih tyngeh ban dawa ia ka sorkar jylla ban pyntrei kam ia ka Inner Line Permit ha kane ka jylla, hynrei ka sorkar u Dr Mukul ha katei ka por kala kyntait ban pdiang ia ka jingdawa ILP.
Ha dien ka jingiasylok bad ki seng bhalang ryngkat ka kynhun sorkar la lah ban ia sngewthuh ban don ka ain kaba dei jong ka jylla hi bad ha u snem 2016 la lah ban pdiang hapoh ka iing dorbar ia ka MRSS Bill, bad kane ka Bill kala kylla ain ha dien bala ioh ia ka jingmynjur jong u lat ka jylla ia kaba la tip kum ka MRSSA.
Ha kane ka sngi nalor kitei ki ar ngut kimyntri la don lang ruh ki MLA na Ri Bhoi, ka Deputy Commissioner ka kong R M Kurbah bad kum juh ki ophisar na ka tnad sahang suwari jong ka sorkar jylla bad kane ka khyrdop kala trei kam naduh mynta ka sngi.
