Mairang, Nailar 24: U Myntri ba dei peit ia ka tnad sam um jong ka sorkar jylla u Bah Samlin Malangniang mynta ka sngi u la plie ia ka “2nd edition jong ka Football Knock Out Tournament 2019” ha madan Kynshi Bangla , West Khasi Hills District ia kaba la pynlong da ka Kynshi Bangla Social bad Cultural Sports Club.
Haba kren ha kane ka sngi kum u kongsan na ka liang jong u myntri u la ong ba dei ban pynshlur ha ki kam ialehkai khamtam ia ki samla ba kin long kiba koit ba khiah ban lait na ki jingpang kum ka jingkhluid khlieh.
Ha ka juh ka por la ong ba ka jingialehkai kamd ei ban ka ai jingmyntoi tang ia ki nongialehkai hynrei wat ia ki nongpeitkai ruh ka ai jingmyntoi lang namar ka weng ia ka jingkhia jong ka jingmut jingpyrkhat na ki kam ki jam kiba ki trei man la ka sngi.
Ha kane ka sngi sdang ia ka jingialehkai la sdang da ka jingialehkai ha pdeng ka Assam Regiment Football Club bad ka Sawmer Football Club,bad ha kane ka jingialeh kala ka Assam Regiment Football Club kala jop pyrshah ia ka Sawmer Football Club 3-2 kol.
Baroh ki team kiban ia shim bynta ha kane ka jingialehkai kin long 16 tylli. Kiwei kiba la ia don lang ha kane ka sngi ki long u Bah HB Nongsiej, MLA Mawthadraishan Constituency, u Bah A Nongbri, SDO (C) Mairang Civil Sub – Division, Bah M Diengdoh, EAC Mairang Civil Sub – Division, Bah L Dhar, Executive Engineer, PHE Mairang Civil Sub – Division u Bah A Syiemlieh, Sordar Kynshi Bangla.
