Shillong, Nailar 10: U Bah Prestone Tynsong Symbud Myntri Rangbah Ka Jylla mynta ka sngi ka 10 tarik u Nailar 2024 u la ioh ban plie paidbah ia u Durmot ba shirynieng jong u Rev JJM Nichols Roy ia u ba la niew kum u Kpa ka Six Schedule ia ka ba la tei sah kynmaw ha phyllaw jong ka Lariti International for Performing Arts & Culture Shillong.
Ha kane ka sngi plie ia u mut dur u Rev JJM la wan ban sakhie lang da ki MDC jong ki 10 tylli ki Autonomous District Council jong ka thain Shatei lam Mihngi ka ri India bad kynthup ruh ia u bah Paul Lyngdoh Myntri ka tnad Arts & Culture ka sorkar Jylla, u CEM ka KHADC u bah Pyniaid Sing Syiem, ki Syiem, ki Sordar bad kiwei kiwei.
Ha ba ai jingkren kum u kongsan na ka liang u bah Prestone Tynsong u la ong ba ka Meghalaya ka tip ia u Rev JJM Nichols Roy kum u kap ka Six Scheduled. U la ong ruh ba ngi dei ban sngew sarong ba kum u nong pynwandur ia ka Six Scheduled, u la ong ba ka Meghalaya ka long kumne kum ba ka long mynta ka dei lyngba ka jingdon ka Six Scheduled.
U la pynkynmaw ruh ba ha kine ki khyndiat snem ba la leit noh ka Sorkar India ka la pyntrei kam ia ka CAA bad ka Meghalaya ka la lait na kane ka Ain da ka jingdon jong ka Six scheduled.
U bah Tynsong u la ong ruh ba ngi dei ban ai ka jingiaroh ia u Rev JJM, ia ka iing ka sem jong u, ka Balang U Blei ka ba la pynmih kum ia u Rev JJM u ba la noh synniang shikatdei eh. U la ong ruh ba u kyrmen ba kane ka sngi kan long ka bas ah kynmaw pateng lapateng ha ka Histiroy jong ka Jylla bad kumjuh ruh ha ka history jong ka Six Scheduled jong ka Ri India.
Ha kane ka sngi la ioh ruh ka jingkren pdiang na u CEM ka KHADC u bah Pyniaid Sing Syiem bad la ioh ruh ka jingbatai hlor u motdur da u bah Rafel Warjri.
