Shillong, Risaw 01: U Myntri Khynnah ka Sorkar Pdeng ba dei khmih ia ka tnad Skill Development and Entrepreneurship mynta ka sngi u la plié paidbah ia 30 tylli ki Entrepreneurship Development Centre ha kylleng ka thain shateilammihngi ha ka “Northeast Skill Development and Entrepreneurship Conclave 2024” ha IIM Shillong.
Kane ka conclave ka la long ka dak jong ka jingsdang ia kane ka sienjam ba heh ban seng 30 tylli ki Entrepreneurship Development Center (EDC) bad saw tylli ki Incubation Center (IC) ha kylleng ka thain shateilammihngi hapoh ka tnad Skill Development and Entrepreneurship. Kane ka projek ka thmu ban pynkupboria ki samla da kaba kyntiew ia ki sap seng kam lajong bad ka jingtei ia ka jinglong jingman kaba iahap lyngba kine ki 30 tylli ki EDC bad saw tylli ki IC.
Ka kynthup lang ia ki sienjam ba heh kum ka jingkyntiew ia ki jingdon jingem, bad kiwei kiwei ki sienjam kum 90 tylli ki prokram ai jingtip shaphang ka jingseng kam lajong, 90 tylli ki prokram ban kyntiew ia ka jingseng kam lajong, 40 tylli ki prokram ban pyntbit shuh shuh ia ki nonghikai bad ki jingiakhun bapher bapher ban pynshlur ia ka jingsaindur thymmai. Kine ki sienjam ki thmu ban don ka jingsdang 900 tylli ki startup ha kane ka thain.
U Chaudhary, u la ban jur halor ka jingkongsan jong ka Entrepreneurship Conclave bad ki lad kiba don ha ka thain shateilammihngi bad u la ong, “Ki jylla ka thain shateilammihngi, ha kine ki 10 snem ba la dep, ka la mad ia ka jingkhyllie im biang, bad ka la poi biang sha ka kyrdan kaba paw.
Ka jingpeit bniah ka Sorkar ha ka polisi ‘Act Fast for North East and Act First for North East’ ka la plié lad ia kane ka thain ba kan paw kum ka bynta kaba heh ha ki kam bapher bapher.
Lyngba ka jingkiew ki lad ka leit ka wan bad ka jingbun ki samla ba la nang la stad, baroh phra tylli ki jylla ki la sakhi ia ka jingkiew shaphrang, kaba la don ka bynta kaba heh ha ka thong jong ka India ban poi sha ka ioh ka kot kaba san trillion.
Kane ka prokram ka thmu ban kyntiew ia ka jingseng kam lajong bad ka jingkyntiew ia ki sap ha ka thain shateilammihngi jong ka India. Ka conclave ka la kynthup ia ka jingpynshlur ia ka jingiatreilang ha ka thain da kaba pyniahap ia ki sienjam ha ki jylla bad ki jingthmu ka Tnad ban don ka jinglong jingman kaba khlain ha ka jingsengkam lajong bad ki sap.
Ha kane ka prokram la wan iashim bynta lang dau Nyato Dukam, Myntri ki tnad Commerce & Industries, Labour & Employment, Information, Public Relations & Printing, Sorkar Arunachal Pradesh, bad Jayanta Mallabaruah, Myntri ki tnad Public Health Engineering, Skill, Employment & Entrepreneurship and Tourism Departments, Sorkar Assam.
U bah Shakliar Warjri, Myntri ki tnad Sports and Youth Affairs and Labour Registrations and Stamps, Sorkar Meghalaya, Lalnghinglova Hmar, Myntri Khynnah ki tnad, Labour, Employment, Skill Development and Entrepreneurship, Sports and Youth Services, Excise and Narcotics Department, Sorkar Mizoram.
Ki jingiakren ki la long halor ki rukom ban pyndonkam ia ki lad ki lynti kiba don ha ki samla jong ka thain lyngba ka jingpyntbit bad ka jingseng kam lajong, da ka jingpeit bniah ia ki jingpynbeit lyngba ki jingsaindur thymmai bad ka jingkiew ka thain.
Kane ka jingiatreilang ka thmu ban wanrah ia ka jingkiew ka ioh ka kot ha ka rukom kaba iaineh ha ka thain shateilammihngi. Ki nongialam na ki jylla ka thain, ki riewshemphang ha ki kam, ki nonghikai ki la iadon lang ha kane ka conclave, bad ki la iakren shaphang ka jingpynkhlain ia ka thain bad ka jingplie ia ki lad ba thymmai.
KI Myntri ki la batai shaphang ki rukom treikam ba seisoh tam ha ki jylla jong ki bad ki la ban jur halor ka jingkongsan jong ka jingtei ia ka jinglong jingman kaba khlain ha ka jingkyntiew ia ki sap kaba iahap bad ka jinglong kaba kyrpang jong ka thain ha kaba iadei bad ka deiriti bad ka ioh ka kot.
Ki la ban jur halor ka jingdonkam ban kyntiew ia ki ITI, ka jingbei tyngka bad ka jingpyntreikam ia ka rukom jied ia ki nonghikai kaba kham bniah khnang ban don ka jingai jingpyntbit kaba kham biang.
Da kaba ithuh ia ka jingshongdor jong ki mar ba shna da ki kti, ki la ong ba dei ban pyndonkam ia ki jingnang jingstad jong kine ki nongshna tiar kum ki nongohshrong ia ki dieng, ki nongshna tiar da ki siej, ki nongthain carpet, ha ryngkat ka jingpyniahap ia ki jingnang jingstad tynrai jong ki bad ki jingdonkam ha ki iew ha kane ka juk mynta.
“Nga ioh mynseim shisha na kane ka jingiakrenshai ba ngi la ioh mynta ka sngi.Ka long kaba shai ba man ka jylla ka don la ka jong ka jingeh, hynrei kaba paw shai ka dei ka jingthrang bad ka jingkut jingmut jong baroh.
Ka jingban jur u Myntri Rangbah Duh halor ka jingiatreilang ka Sorkar Pdeng bad ki Sorkar Jylla ka paw ha kane ka jingiatreilang jong ngi – ngi dang pyrkhat jngai da kawei ka jingthmu na ka bynta ka India ha u 2047,” u la ong.
U Jayant Chaudhary u la ong, “Kawei ka jingthmu ia ka India ha u 2047, ngi dang pynkylla ia ki rukom treikam jong ngi ban kyntiew ia ki ITI, pdiang ia ki jingiatreilang hapdeng ka Sorkar bad ki kynhun, ki riew shimet, bad sumar ia ki lahduh ha ka pyrthei lyngba ka jingkyntiew ia ki sap bad ka jingseng kam lajong.
Da kaba pyndonkam ia ki rynsan kum ka SIDH bad ka jingepit ia kiwei kiwei ki lad kum ka jingioh jinghikai ha ki jaka sah, ngi lah ban pynthikna ba ki samla jong ngi ki long kiba la pynkhreh na ka bynta ka lawei.”
Kane ka sienjam ka thmu ruh ban ai jinghikai ia 600 ngut ki nonghikai bad pynthikna ki jingdon jingem ha ki jaka pule ba kham halor. La dep shim ia ki sienjam ha kaba ki khliehduh jong ki centre ki la ioh jingpyntbit ha ka Indian Institute of Entrepreneurship (IIE) bad la seng ruh ia ki EDC.
Ki prokram ban kyntiew ia ka jingseng kam lajong kin iarap ia 900 ngut ki samla ba kin iakhun ban ioh rung ha ki incubation prokram, ha kaba 50 ngut na ki kin ioh ia ki bai sdang treikam kaba haduh T 5 lak. Ka projek ka pynthikna ruh ia ka jingpyniasoh bad ki skhim Sorkar kiba iahap ban kyrshan ia ka jingkyntiew ia baroh 900 tylli ki business plan.
U Maotoshi Longkumer, MLA bad Advisor, Labour & Employment, Skill Development & Entrepreneurship, & Excise Department, Sorkar Nagaland, MadanCinturi, MLA bad Advisor jong ka Sorkar Sikkim, tnad Skill Development bad Shreeshail Malge, Joint Secretary, ka tnad Skill Development and Entrepreneurship, Sorkar India, ki la iadon lang ha kane ka sngi. La wan iashim bynta lang ruh da u Prof D.P. Goyal, Director ka IIM Shillong, kum u Symbud Kongsan.
Hapoh ka Skill India Mission, ka tnad ka la shim ia ki sienjam ba heh ban kyntiew ia ki sap ha kylleng ka ri da kaba peit bniah ia ka thain shateilammihngi. Lyngba ka PradhanMantriKaushalVikasYojana (PMKVY), palat 13.40 lak ngut ki briew ki la ioh jinghikai naduh u 2015 ha kaba T 857.84 klur ka dei kaba la mangna ka bynta ki jylla ka thain shateilammihngi.
Ka sienjam Jan ShikshanSansthan (JSS) ka la ai jingpyntbit ia 1.24 lakngut ki briew naduh u 2018 ha kaba don T 37.26 klur na ka bynta ka thain shateilammihngi. Shuh shuh, 1,015 tylli ki jaka treikam ki la pdiang ia 43,820 ngut ki apprentice hapoh ka skhim National Apprenticeship Promotion (NAP).
Shuh shuh, 73,487 ngut ki briew ki dei kiba la pynrung kyrteng ha 110 tylli ki ITI ha kylleng ka thain naduh u snem mang tyngka 2014-15, ha kaba 48,870 ngut ki Vishwakarma ki la ioh jinghikai hapoh ka PM Vishwakarma.
Ban pynkhlain ia ka jinglong jingman jong ka jingpyntbit ha ka thain shateilammihngi, la pyllait T 43.13 klur, kaba kyrshan ia ki sienjam ba kynthup ia ka PM-JANMAN, PM Daksh, bad SFURTI, ha ryngkat ka skhim ba bei tyngka da ka Sorkar Pdeng ban kyntiew ia ki ITI.
Shuh shuh, ki jingdon jingem na ka bynta ki kam digital ia ki paidbah ki dei kiba la saindur ban pynkylla ia ki jinglong jingman jong ka jingpyntbit, ka jingioh kam bad ka jingseng kam lajong kaba pynkupbor ia ki samla ha kylleng ka thain shatilammihngi ba kin don bynta ha ka jingkiew ka ioh ka kot jong ka ri.
Ka Northeast Skill Development and Entrepreneurship Conclave 2024 ka dei ka dak jong ka juk kaba thymmai ha ka jingiaid lynti ka thain sha ka jinglah pyndap ialade bad ka jingkiew shaphrang.
Lyngba ka jingpeit ia ka jingpynkupbor ia ki samla, kane ka conclave ka la pyni ia ka jingkut jingmut ka Sorkar bad kito kiba don bynta ha ka kam ban wanrah ia ka jinglong jingman kaba kyntiew ia ka jingsaindur thymmai, ka jingseng kam lajong bad ka roi ka par kaba iaineh ha ka thain shateilammihngi jong ka India.
