New Delhi, Jylliew 02: U Myntri Sorkar Pdeng ba dei khmih ia ki tnat Kam Pule Puthi bad Jingkyntiew Sap, u Dharmendra Pradhan mynta ka sngi u la pyllait ia ki kyndon UGC (Institutions Deemed to be Universities) Regulations, 2023 ha ka jingiadonlang u Prof. Jagadesh Kumar, Chairman, UGC bad u Sanjay Murthy, Secretary (Higher Education), ka Tnat Kam Pule Puthi.
Ha kane ka sngi, u Pradhan u la ong ba ki kyndon UGC (Institutions Deemed to be Universities) Regulations, 2023 kin plié lad ia ka jingseng shuh shuh ia ki skul bah kiba bha ha ka rukom kaba iaidryntih bad kaba shai. Ki kyndon ba thymmai ba la pynsuk kin pynshlur ia ki skul bah ba kin peit janai ia ka jingbha ka jingai jingshakri.
Ban pynkhlain ia ki kam wad bniah bad kin don ka jingktah kaba jrong samoi ha ka jingpynkylla ia ki kam ai jinghikai kiba kham halor. U Myntri u la iarohia ka UGC halor kane ka jingpynkylla kaba biang por kaba iadei ruh bad ka National Education Policy 2020.
Ka UGC Act 1956 ka plié lad ia ka Sorkar Pdeng ba kan ithuh ia kanokano ka jaka pule kaba lait na ki skul bah ba kin ioh ia ka kyrdan ‘Institution Deemed to be University’ ba kin long kum ki skul bah katkum ka jingbatai ha ka Section 2(f). Haba ioh ia kane ka jingithuh, yn khein ba kine ki jaka pule ki dei ki skul bah.
Ka rukom ban ai jingithuh (General) abd De Novo, ka jingsengia ka jaka Pdeng ka bym don ha ka jaka jingpule, ki jingdonkam ban ioh ia kane ka jingithuh, ka rukom pyniaid, bad kiwei kiwei ki dei kiba peit hapoh ki kyndon UGC Regulation. Ka thup ba nyngkong jong kine ki kyndon ki dei kiba la pynbna ha u snem 2010, bad la pynkylla ia kine ha u snem 2016 bad 2019.
Ha ka jingpynbna ia ka National Education Policy 2020 bad khnang ban pynsuk ia ki kyndon, ka UGC ka la thung ia ka kynhun jong ki riewshemphang ban peit biang bad pynkylla ia ki kyndon.
Ki kyndon ki la iaid lyngba ki bynta bapher baphershuwa ban pyndep ia ki. Ka jingialam lynti jong kane ka kynhun ki riewshemphang, ki jingai jingmut na ki paidbah bad ki jingai jingmut na ka Commission ki dei kiba la peit sani bha shuwa ban phah ia ki kyndon ba khatduh sha ka Tnat kam Pule Puthi ba kan ai jingmynjur.
Kine ki kyndon ba thymmai ki wan ha ka jaka jong ki kyndon UGC (Institutions Deemed to be Universities) Regulations 2019, bad la thaw ia ki ha ka nongrim ban don ki rukom treikam ‘kiba sting tangba kiba khlain’ kumba la thmu ha ka National Education Policy 2020. Ki mat ba kongsan jong ki kyndon.
Ki kyndon ki iahap bad ka National Education Policy 2020. Ki jingthmu jong ki jaka pule ba ioh jingithuh kum ki skulbah, ha ryngkat kiwei kiwei, ki kynthup ka jingpynbiang ka pule puthi kaba kham halor kaba wanrah ia ka jingtbit ha ki bynta bapher bapher jong ka jingnang jingstad.
Khamtam ha ki kyrdan undergraduate, post-graduate bad research degree, kiba bud ia ka jingithuh ia ka skul bah, ban pynkhlain ia ki kam wad bniah bad ban don bynta ha ka jingkylla ha ka imlang sahlang lyngba ka jingai jinghikai, ka jingioh jingnang jingstad, ka jingwadbniah bad kiwei kiwei, kiba don jingbahkhlieh.
Ka jingdonkam ban pan jingbit ban long ki jaka pule ba ioh jingithuh kum ki skulbah ka long NAAC ‘A’ grade kaba don kumnokumno 3.01 CGPA ha ki lai cycle ba bteng lane ka jingithuh NBA ia ar na ki lai bynta jong ki prokram ha ki lai cycle ba bteng lane ha ki 50 kyrdan ba halor tam jong kanokano ka thup NIRF ha ki lai snem ba bteng lane ki 100 kyrdan ba halor tam jong ki kyrdan NIRF Ranking ha ki lai snem ba bteng.
Ka thup jong ki jaka ai jingpule ba pyniaid da palat kawei ka kynhun bei tyngka ruh ki lah ban pan ban long jaka pule ba ioh jingithuh kum ki skulbah. Ki kynhun bei tyngka kiba kwahia kane ka jingithuh na ka bynta ki jaka pule jong ki, ki lah ban pan jingbit online. Ka kynhun ki riewshemphang ka peit ia ki jingai jingshakri, ka iakren bad kito kiba iadon bynta, bad ka pynshisha ia ki kot ki sla lyngba ki lad online.
Ki jaka pule ba ioh jingithuh kum ki skulbah ki lah ban sdang ia ki prokram ne ki jingai jinghikai ba thymmai ha kanokano ka bynta ha ki jaka ai jinghikai jong ki bad ki jaka ai jinghikai kiba sha kiwei kiwei ki jaka ba la ioh jingbit, lyngba ka jingioh jingbit na ka Executive Council, bad lada donkam, da ka jingioh jingbit na ka Council ba dei ban peit ia kane.
Ka jaka ai jinghikai ba la don lypa ne kaba sdang thymmai kaba peit bniah ia ka jingai jinghikai ne ka jingwad bniah ha ki kam ba kyrpang bad kiba peit ia ki jingdonkam jong ka ri lane kiba trei na ka bynta ka jingpynneh ia ka deiriti jong ka India lane ka jingpynneh ia ka mariang lane kiba peit bniah ia ka jingkyntiew ia ki sap.
Kiba peit ia ki kam ialehkai ne ka ktien ka thylliej lane kino kino kiwei ki kam, kumba la sngewthuh da ka kynhun ki riewshemphang jong ka Commission, ki dei kiba yn peit hapoh ka thup ‘Distinct Institution’. Kum kine ki jaka pule kin laitna ki kyndon kiba iadei bad ki jingdonkam ban ioh jingithuh.
Ki jaka pule ba ioh jingithuh kum ki skulbah kiba don kumnokumno ka ‘A’ grade lane kiba don hapdeng ki kyrdan 1 bad 100 ha ka thup ‘Skulbah’ jong ki kyrdan NIRF jong u snem ba peit ki lah ban seng ia ki jaka ai jinghikai ha kiwei kiwei ki jaka.
Ki jaka pule ba ioh jingithuh kum ki skulbah hapoh ka thup “distinct category” ki lah ban pan jingbit ban ai jinghikai ha kiwei kiwei ki jaka hadien san snem ba ki la ioh jingithuh lada ki don hapoh ka A grade lane lada ki don ha ki kyrdan 100 ha ka thup “universities” jong ka NIRF.
Ki kyndon ki peit ia ka jingbha ki jingai jingshakri. Yn peit ia ki jaka pule ba ioh jingithuh kum ki skulbah bad ka NAAC kaba duna ia ka ‘A’ grade lane kiba lait na ki kyrdan 100 ha ka kyrdan NIRF ranking (thup skul bah) ba mynta katkum ki jingai jinghikai da ka kynhun ki riewshemphang ka UGC.
Lada kim lah ban pynbeit ia ki jingduna ba la kdew da ka UGC Committee, ka UGC ka lah ban ai jingmut ban weng noh ia ka jingai jingbit ban sdang ia ki jingai jinghikai lane ki prokram ba thymmai da ka jaka pule ba ioh jingithuh kum ki skulbah, ha kanokano ka bynta, ha ka jaka ai jinghikai jong ki ne kiwei kiwei ki jaka ai jinghikai jong ki.
Ki jaka pule ba ioh jingithuh kum ki skulbah kin bud ia ki kyndon ha kaba iadei bad ka jingbuhdor, ka jingdon ki seat, bad kiwei kiwei, ba la ai da ki bor ba dei peit, bad lada ka jaka pule ba ioh jingithuh kum ki skulbah ka ai kiwei kiwei ki jingpule kiba hap hapoh ka jingpeit jong kiwei kiwei ki bor kum ka University Grants Commission.
Ka All India Council of Technical Education, National Medical Council, bad kiwei kiwei, ki kyndon kiba iadei bad ka jingbuhdor, ka jingdon ki seat bad kiwei kiwei kumba la batai da kine ki bor kin treikam.
Ki jaka pule ba ioh jingithuh kum ki skulbah ki lah ban ai jingpyndunador lane ki scholarship lane ki lah ban ai seat ia ki samla pule kiba wan shakhmat kiba dei na ki bynta ba shem jingeh jong ka imlang sahlang.
Ki jaka pule ba ioh jingithuh kum ki skulbah kin pynbiang ia ki jingtip Academic Bank of Credits (ABC) jong ki khynnah pule bad buh ia kine ki jingtip ha ki digital locker bad kin pynthikna ba ki credit score ki paw ha ka rynsan ABC bad kin pyntreikam ia ka Samarth e-Gov. Shuh shuh, ki jaka ai jingpule kin ai ia ki Twinning Programme, ki Joint Degree Programme bad ki Dual Degree Programme katkum ki kyndon.
Ka jingshai ha ka rukom treikam jong ka jaka pule ba ioh jingithuh kum ki skulbah ka iarap ban wanrah ia ka jingiadei kaba kham khlain hapdeng ki shah hikai bad ka jaka pule. Ki kyndon ki plié lad ban don jingshai shuh shuh ha ka rukom treikam ki jaka ai jinghikai.
Ki jaka pule ba ioh jingithuh kum ki skul bah kin pynbiang ia ki prospectus ha ki website jong ki kumnokumnohynriewphew sngi shuwa ban khot admission, ba kynthup ia ki dor, ka rukom pynphai pisa, ka jingdon seat ha ki prokram, ka jingdonkam ban ioh rung ha ki jingpule, ka rukom jied ia ki shah hikai, bad kiwei kiwei.
Man ka jaka pule ba ioh jingithuh kum ki skulbah ka buh jingtip jong ka rukom jiedia ki shah hikai, kin buh ia kine ki jingtip ha ka website jong ki bad kan buh ia kine ki jingtip kumnokumno haduh san snem.
