Shillong, Jymmang 11: U Bah Baiahunlang Makdoh ba ju khot ieit da ki nongshong shnong kum u Bah Baia, u la rai ban aireng ha ka elekshon sha ka Iingdorbar Thawaiñ ka jylla, ha u 2023, na ka Mawhati Constituency.
Katkum utei u rangbah, u la iathuh hakhmat u nonglum khubor ba u dei uba la shongthait na ka kam kum u ophisar sorkar ha ka tnat PWD (Rd) bad u la pyndep ia ka kyrdan pule kum u BE (Civil) na shabar jylla, kata na Ahmedabad bad Gujarat.
U tei u rangbah hadien ba u la shakri ha katei ka tnat ha ki 30 snem eiei, u la ioh shongthait noh bad shim rai ban mih madan kum uwei na ki kyrtong MLA na ka Mawhati constituency.
Utei u rangbah u dei u trai shnong na Mawrong, u la sdang ka jingleit skul ha ki kyrdan ba dang rit ha la shnong,, hadien u bteng ha ki kyrdan ba kham shalor ha ki jaka pule ha nongbah Shillong bad pyndep ia ka jingpule kum u BE (Civil) shabar jylla.
U Bah Baia u la iathuh ba ka jingmih madan jong u ban aireng ka long hadien ba u la iohi ia ka eh ka shon jong ka constituency ba u don, da kaba ñiewtang ia ka jingtrei ki MLA ba la leit noh naduh u Prof MN Majaw, u Bah SR Moksha, u Bah PW Muktieh, u Bah Donbok Khymdeit bad u Bah JK Dorphang, katba um shym la kynthoh eiei pat shaphang u MLA ba mynta u Bah Dasakhiatbha Lamare.
Ha ka jingkren jong u, u la ong ba mynta u don ha ka lynti jong ka jingpan tiket da kaba u la jied ia ka UDP kum ka party ba biang tam eh ban iakhun ha ka elekshon, bad ia mynta hi un pyniasoh shwa bad katei ka party.
