Shillong, Lber 10: Ka jingpyntrei ia ka skhim JJM sha ki khappud bad ka Bangladesh kala dang iaid sha khmat bad bun na ki shnong kha khappud kiba hap hapoh ka Mawsynram Block na Dangar sha duh Ryngku kila ioh ia ka bor ding Solar ban pump um ban pynpoi sha ki top um.
Haba u SP News Agency u la poi sha kine ki shnong haba ia kren bad ki trai shnong kila iathuh ba kine ki Solar ki dei kiba la buh da ka PHE ban pump um ban pynpoi sha ki top um kiba dei jong ka skhim JJM.
Na ka liang jong ki briew kiba la ioh ban ia kren kila ong ba kane ka jingpump um kala don ka jingpynrshang hynrei ka bor jong ka ding kaba mih na kine ki solar kam neh slem ki lah ban pump hapoh ka shikynta bad kila lip hi noh.
Kine ki Solar kiba la pyndon kam ban pump um la iohi bala buh ia ki ha shilynter ka surok ha katei ka thain na Dangar sha Ryngku namar ka jingpyntrei ia ki skhim sam um JJM ki dang iaid haduh mynta.
