Shillong, Jymmang : U MP ka Rajya Sabha u Dr WR Kharlukhi ha ryngkat bad u nongai buit jong u Myntri Rangbah u Bah Hamlet Dohling kila pynhap pyrda noh ia ka jingrakhe dap 150 snem jong ka Umlyngka Presbyterian Lower Primary School Umlyngka ha ka sngi Thohdieng.Ia kane ka shlem ai jingnang jingstad ban shakri ia ka thaiñ baroh kawei ha ka liang ka pule puthi la seng ha u snem 1875 bad ha kane ka sngi napdeng ki kongsan la ia don lang ruh ki Pastor, Tymmen Basan, ki nongialam Balang, ki Nongialam Shnong, ki nonghikai bad ki kmie ki kpa.
Haba kren ha kane ka sngi kum u Kongsan, u MP u la ong ba ka long ka kam kaba khraw haduh katta katta ba katei ka skul ka la lah ban kam ia u mawmer ba 150 snem ha ka pule puthi.
“Ban ong ba la 150 snem kane ka skul ka la shakri ka la dei ka kam kaba khraw bha,” la ong u MP.
Ha kajuh ka por u ong ruh ba ki mishoneri kiba wan ban seng skul 150 snem mynshwa ha kane la thain ki dei ki agent ba la phah da u Blei ban wanrah ia ka jingshai ia ka shnong ka thaw lyngba ka pule puthi.
Da kaba ai burom ia ki nonghikai ha kine ki 150 tylli ki snem, u Kongsan u la ong ruh ba wat ialade u kham sngewtynnad ban pynithuh kum u nonghikai ym kum u MP namar ka kam nonghikai.
