Shillong, Nohprah 04: Mynta ka sngi ka kynhun shipai suin kala pynlong ia ka jingrakhe ia ka Swarnim Vijay Varsh kum ka jingithuh ia ka jingdap 50 snem ka jingjop ka India ia ka thma hapdeng ka India bad ka Pakistan ha u snem 1971.
Kum shi bynta jong kane ka jingrakhe, ka Eastern Air Command ka la pynlong ia ka jingpynher ia ki liengsuin ha ka 4 tarik u Nohprah, 2021 kiba la her nalor ka wah Umiam ha ka por 10 baje mynstep.
Ban ithuh ia kane ka sngi, ka la don ka jingpynher ia ki liengsuin ka IAF bad ka jingpynher liengsuin da ka Suryakiran Aerobic Team (SKAT) jong ka Indian Air Force. U Lat ka Jylla, u Satya Pal Malik u la long u kongsan ha kane ka sngi.
Ki nongpynher liengsuin kiba la shongthait, ki heh ki hain, ki ophisar bad ki briew ki la ia peit ia kane ka jingpynher ia ki liengsuin na ki jaka bapher bapher harud ka Wah Umiam. Ha kane ka sngi la don shibun ki briew na ka tnad iada Ri ban sakhilang ia kane ka sngi.
Ha kane ka sngi ki nongwan kai shangsuwari sha kane ka jylla Meghalaya da ki spah ngut ki la ieng ha Mawlai View Point ban ioh ban peit ia kane ka jingpynher ia kine ki lienguin ia pom ka Ri India ban kynmaw burom ia ka jingjop thma pyrshah ia ka East Pakistan kaba la kha ka ri Bangladesh mynta ha u snem 1971.
