Shillong, Lber 22: Ka tnad rep soh jong ka sorkar Meghalaya da ka jingiatreilang bad ka APEDA kala pynlong ia ka jingialang kaba shisngi ha State Convention Centre ban pyniakynduh ia ki nongrep bad ki nongkhaii ban pyniaid iew ia ki marrep na kane ka jylla sha bar Ri.
U Principal Secretary jong ka sorkar jylla ba dei peit ia ka tnad rep u Dr. P. Shakil Ahammed haba kren kum u kongsan haba plie ia kane ka jingialang la ong ba kane ka jingiakynduh hadpeng ki nongrep bad ki nongkhaii ka long ka kam kaba ka jingiadei kan neh slem bha ban poi sha ka thong.
La ong ba ka kam khaii sha bar ri ka long ka kam kaba jur bha ha ka jingiakop ha ka dor ka mur bad ha kane ka jingiaid lynti kum ki nongkhaii kam dei kaba suk namar don kam ia ka jingiashaniah kaba mar kylliang ha kaba kan don ka jingiamyntoi lang ha pdeng ki nongrep bad ki nongkhaii.
U Dr Ahammed u la ong ba ka sorkar kala wanrah shibun ki jaid skhim ban ai ka jingkyrshan ia ki nongthed bad kum juh ia ki nongrep bad kane ka long ban pynthikna ba ka jingiakhaii ia ki marrep sha bar jong ka Ri India kan urlong. Ka sorkar Meghalaya kala pyrkhat kumno ban pynwan dur ia ka rep ha ki dong ki thain katkum ka jinglong ka jaka ban ioh ia kawei ka jaid marrep.
Kane kam dei ka jingiakynduh kaba shisien hynrei kan wanrah ia ka jingiakynduh kaba man ka por ha pdeng ki nongkhaii bad ki nongrep, kiba la kren ha kane ka jingiakynduh ka long ka Sunita Rai, Assistant Manager, APEDA, ba dei na ka tnad khaii jogn ka sorkar pdeng, ia ka jingkren sdang la kren da ka kong S Nongbet, Director ka tnad rep soh ba dia ka jingkren pdiangburom la kren da ka kong L Kharkrang.
