Shillong, Nohprah 12: ka District Magistrate jong ka East Khasi Hills District ka kong Matsiewdor War Nongbri mynta ka sngi kala pynbna ba la pynjari ia ka Curfew ha ki jaka kiba hap hapoh jong ka Lumdiengjri Police Station bad Sardar police Station. Kane ka Curfew kan trei kam naduh mynta ka sngi ka 12th Nohprah 2019 naduh ka por 10.00 PM haduh ban da pynbna da kumwei pat.
Ha ka hukum kaba la pynmih mynta ka sngi na ka liang jong ka Magistrate kala ong ba kala ioh jingtip ka don ka jingbym shong shngian bad kane ka lah ban pynmih ia ki jingklumar ha ki jaka kiba hap hapoh jong ka Lumdiengjri Police Station bad jong ka Sardar Plice Station ha kaba kala don ka jingthang kali bad pynjulor ia ki dukan.
Naka liang jong ka Magistrate ha dien ba kala bisahr bniah kala shem ba kane kan wanrah ia ka jinghuri hura kaba lah ban neh bad kan ktah ia ka shong suk shong sain kumta katkum ka bor kaba la pynkup ha ka hapoh jong ka kyndon 144 CrPC mynta ka sngi la pynbna ba la pynjari iaka Curfew ha kine ki bynta jong ka nongbah Shillong.
Ki jaka kiba hap hapoh jong ka Sardar Police Station ki long ka,Police Bazar, jail Road Keating Road bad Polo, ki jaka kiba hap hapoh jong ka Lumdiengjri Police Station ki long ka Jaiaw, Mawkhar, Umsohsun Riatsamthiah,Wahingdoh, Mission Mawprem, Lumdiengjri, Qualapaty, Wahthapbroo, Suny Hills,Cantoment, Boucher Road, Mawlong Hat boucher Road lait noh ki jaka ba long sha bar jong ka jingkieng Umsherpi.
