Shillong, Risaw 12: Haduh khatar tylli ki iing hapoh ka shnong Kalapahar kaba hap hapoh jong ka Ranikor Block jong ka South West Khasi Hills District kila la shah pynjot ha u Hati khlaw ha ka miet sngi u Blei por 7.30 Pm , ha kane ka jingjia dang don bok ba u hati ym shym la pynmynsaw ia ki briew.
Katkum ki khubor kiba la ioh na katei ka thain la iathuh ba u Hati u la wan ha ka por miet hapoh kane ka shnong bad ym tip na ei u la wan bad u la pynjot ia ki 12 tylli ki iing briew bad ki jingrep khamtam eh ia u soh Trun.
Ka shnong Kalapahar ka ia khap bad ka shnong Rajai kaba don ha khappud bad ka Bangladesh bad la ong ba kine ki hati kiba la wan rung sha kine ki shnong ban wan wat bam kila kiew na Bangladesh.Na ka liang jong ki nongshong shnong kila pyntip ia kane ka jingjia sha u MLA barim jong ka Ranikor u Martin M Danggo.
U bah Stelin Diengdoh SDO jong ka Ranikor Civil Sub Division haba kren ha u SP News Agency u la iathuh ba u la ioh ia kane ka jingtip bad na ka liang jong u la pyntip sha ka tnad wild life bad mynta kila leit sha katei ka jaka ban jurip halor kane ka jingshah pynjulor.
