Shillong, Jylliew 05:Ki shnong ki thaw ki dei ban long ki ba khuid bad ba suba, shah pynkup burom bad ioh jingiarap ki 10 tylli ki shnong ha ka sngi rakhe sumar mariang.Ka 5tarik u bnai June man ka snem ka pyrthei baroh kawei ka ju rakhe ia kane ka sngi kum ka sngi ba kyrpang jong ka mei mariang. La ju rakhe ia kane ka sngi da kaba tungdieng bad kiwei ki kam ban sumar ia ka mei mariang.
Ha kane ka sngi rakhe ka sumar mariang ki la don 10 tylli ki shnong ba la shah pynkup burom da ka sorkar jylla Meghalaya, Ki shnong ba kynthup ka Mission Compound, Jaiaw Shyiap & Lumpyllon, Cleve Colony, Jaiaw Lansonalane, Jaiaw Pdeng, Riatsamthiah, Lumiablot, Wahingdoh, Nongrim Hills, Rynjah
La ioh ban ia kren kyrpang ia u rangbah shnong ka shnong Rynjah, kawei na ki shnong ba la ioh ia ka nam ba ka dei ka shnong kaba khuid, kaba don ia ka rukom sumar ia ki sawdong sawkun, ki jaka thungdieng bad kaba pynneh pynsah ia ka mei mariang.
U bah Eddie War (Rangbahshnong Rynjah) haba iakren u la iathuh ba ka shnong Rynjah ka ioh ia kane ka kyrdan dei namarba ka shnong ka don hapdeng ka jingkhuid kaba la ithuh hi da ka sorkar khlem kano kano ka jingpyrshang jongki ban pynithuh sha ka sorkar.
U la iathuh ba ka Dorbar Shnong Rynjah ka la ju leh ia kane ka kam ban pynkhuid ia ka shnong ha baroh 7 tylli ki dong jong ka shnong naduh ki por ba la kham mynshwa, ka shnong ka buh da ki briew jong ka shnong hi ban pynkhuid shnong man ka janmit bad ka buh 12 ngut ki briew ban tang peit bad pynkhuid ia ka iew Rynjah. Ka shnong ka ai da ka jingsiew ia ki samla ba pynkhuid ia ka ka iew, namarba ka shnong ka ai tender tang ia ki samla ka shnong hi bad kiba ioh ia ka tender kim nym lah ban aikam ia ki bym dei ki nongshong shnong, kane ka la long ruh kawei na ka lad ban aikam aijam ia ki khynnah samla ha kum kane ka pyrthei ba kyrduh kam bad ka ba sniew, lada ka shnong kam lah ban tehsong ia ki khun samla, ka lah ban wanrah jingeh ha ka lawei.
Haba iadei ka jingioh jong ka shnong ia ka song pisa kaba long 25hajar tyngka u la ong, Hoid ka jingai barit jong ka sorkar lehse kan long ka dur jong i phliah-ding ban kyrsiewthiah pat ia kiwei namar kane ka dei ka jingsdang ba ka sorkar jylla Meghalaya ka sdang ban sngewthuh ia ki jingtrei barit ki dorbar shnong.
U bah Eddie War u la ai ka jingiaroh ia ka jinglah jong ka sorkar ban leh ia kane ka bynta ka ba bha bad kaba pynshlur ia ki shnong ki thaw ba kin lah ban lehkhuid leh suba nangne shakhmat bad ban ratdyngkhong ia ka jingjaboh ki shnong ki thaw ka ban long ka jingmyntoi.
