Shilong, Nohprah 13: Ka Seiñ Kur Dkhar East Jaintia Hills District, mynta ka sngi 12 tarik, u December, ka la pynkup burom kyrpang ia ka Miss Meghalaya, 2022 cum Miss Northeast, 2022, ka Miss Irene Dkhar, na Rymbai, East Jaintia Hills, ha Community Hall, Khliehriat West, East Jaintia Hills, ha ryngkat ka jingiphuh iphieng bad jingishongkhun hadien ba ka la jop ia ka jingiakhun, Miss Meghalaya, 2022 bad Miss Northeast, 2022, kaba dang shu dep leh shen mynta u snem 2022, ha Shillong bad Kohima.
Ha katei ka jingpynkup burom la iadonlang ki nongialam ba pawkhmat jong ka Seiñ Kur Dkhar-EJHD, naduh u President, Teras Dkhar, Ad. Genl. Secretary, M H Dkhar, bad kiwei kiwei de ki nongialam bad ki dkhot-pyntrei kam bad parakur jong ka ka Seiñ Kur Dkhar-EJHD, kiba na ki Circle bad ki Unit bapher bapher jong ka East Jaintia Hills District. Ia i Irene Dkhar la synran lang ruh ha katei ka sngi, da ka kmie bad u kpa bad kiba ha iing hasem jong i.
La pyniaid ia katei ka jingialang pynkup burom da u M H Dkhar. U bah M H Dkhar, haba ai jingkren plie bad maitphang ha katei ka sngi, u la ong ba, ia ka Jingiathuh-khana, kaba dap da ka jingsngewkmen, jingsngew sarong bad jingshlei hun ka mynsiem, kaban sah khana pateng la pateng.
kaba dei kaba kham pher bad kaba bym ju shem la jia koit ha ka jingiathuh-khana jong ka Seiñ Kur Dkhar-EJHD, la thaw lane pynlong ia ka, da i Irene Dkhar, i khun ba bha briew tam jong ka Seiñ Kur Dkhar-EJHD, da ka jingjop don burom jong i ia ka nam bar ka burom, Miss Meghalaya, 2022, bad Miss Northeast, 2022.
U la ong ruh ba ka pansngiat thei ba bha briew tam ha Meghalaya bad Northeast India kaba i Irene Dkhar i la ioh kurup bad phong mynta, ka dei ruh ka pansngiat jong ka burom, ka nam, ka jingsngew sarong bad ka jingkmen kaba khraw jong ka Seiñ Kur Dkhar-EJHD bad jong ka Jaitbynriew hi baroh kawei.
U President ka Seiñ Kur Dkhar-EJHD, u Teras Dkhar, haba ai jingkren ha katei ka sngi, u la pynpaw ia ka jingsngewkmen, jingsngew sarong, bad ruh ka jingsngewnguh kaba khraw ia i Irene Dkhar iba, lyngba ka jingtrei shitom jong i, i la lah ban wanrah ia lade, ia ka iing ka sem jong i, ia ka Kur Dkhar-EJHD, ia ka Jaidbynriew hi baroh kawei, bad ruh ia ka jylla jong ngi ia katei ka nam bad ka burom kum i thei ba bhabriew tam ha Meghalaya bad ha Northeast India.
U la bynrap ruh da kaba ai ia ki jingkyrkhu kyrdoh bad kitbok kit rwiang ia i Irene Dkhar, khnang ba in dang lah ban iaid beit sha khmat na ka bynta ban iakhun ia kaba kum katei ka nam bad ka burom sa ha ki rynsan jong ka ri India bad ruh shabar ri ruh. Khatduh eh u la ai ia ki kyntien sneng kyntien kro na ka bynta kumno ban wanrah ia ka jingiajan, jingiaieit bad ruh jingiatylli hapdeng baroh ki khun ka Seiñ Kur Dkhar-EJHD hi baroh kawei.
U Besterwell Dkhar, Asstt. Professor, Jaintia East College, Khliehriat, ha ka jingkren jong u ha katei ka sngi, u la ong ba ka Kur Dkhar, EJHD hi baroh kawei, ka dap da ka jingkmen, jingsngew sarong bad ka jingshlei hun ka mynsiem marsyn tip ba i Irene Dkhar i la jop ia ka jingiakop thei ba bha briew tam jong u snem 2022, naduh na Meghalaya, bad haduh ha Northeast India hi baroh kawei ha kine ki khyndiat taiew ba la dep.
Ha ka juh ka por, u la kit bok kit rwiang ruh ia i Irene Dkhar ba in beh beit sha pyrshah ka thong kaba don ha khmat jong i na ka bynta ban ioh rah shuh shuh ia kaba kum kane ka nam bad ka burom sa ha ki rynsan hapoh jong ka Ri India bad ruh shabar jong ka ri India ruh.
Ka Kong W.M Dkhar, Selection Grade, Prof. Kiang Nangbah Govt. College, Jowai, ha ka jingai jingkren jong ka ha katei ka sngi, ka ruh ka pynpaw ia ka jingkmen bad ka jingsngew sarong, da kaba ong ba, pleng don napdeng ki khun kynthei jong ka Kur Dkhar-EJHD.
Ka samla Irene Dkhar, iba lyngba ka jigntrei shitom jong ka, kala lah ban poi sha ktei ka thong jong ka nam bad ka burom bad ruh wanrah ia ka nam bad ka burom kaba khraw ia ka iing ka sem jong i, ia ka Kur Dkhar-EJHD, bad ruh ia ka jylla Meghalaya. Ka kong W M Dkhar ruh, ka la ai mynsiem lem shuh shuh ia i Irene Dkhar ba in dang iaid shakhmat khlem kynran dien ban leit kiew ha kiwei pat rynsan jingiakhun ia kaba kum katei ka nam bad ka burom.
La pynphuh pynphieng shuh shuh ia katei ka jingpynkup burom ia ka Miss Meghalaya, 2022 bad Miss Northeast, 2022, i Irene Dkhar, da kawa pynbud sa da ka jingrwai ba kyrpang tang na ka bynta jong ka, ba la rwai da u Lincoln Nixon Dkhar, hadien kata, bud pat sa da kiwei pat ki jingai sngewbha, kata, ar tylli ki mementos sah-jingkynmaw, kata, na ka bynta ka jingjop jong i ia ka pansngiat, Miss Meghalaya, 2022, bad ruh, Miss Northeast, 2022, bad sa da ki riam tynrai bad ka pisa Rs. 6000/- biang.
Kiwei pat kiba ai jingkren ha katei ka sngi, ki dei, ka Kong Bythygrace Dkhar, EM, Seiñ Kur Dkhar-EJHD, kaba ai ia ka jingkren pdiang sñiawbha, bad u Deolangki Dkhar, EM, Seiñ Kur Dkhar-EJHD, Waheh Shnong, Wapungskur, pat ia ka jingkren jingsngewnguh, kane ka long katkum ka kyrwoh bala phah da u bah M H Dkhar wei na ki secretary ka seng kur.
