Shillong, Jymmang 10: Ka National People Women Front (NPWF) jong ka Meghalaya State Unit, kum shi bynta ban kynmaw burom ia la ki jong ki Kmie kiba la pun la kha bad pynheh pynsan, mynta ka sngi kala rakhe ia Mother Day ne ka sngi ba kyrpang jong ki Kmie ha ki lai tylli ki block ha ri lum Khasi Jaintia.
Ha ka jingshisha ia ka sngi ban kynmaw burom kyrpang ia ki kmie ne ka Mother Day kadei lashai ka sngi ka 11 tarik u Jymmang bad namar ba ka ia tyngkhuh noh bad ka sngi u Blei, kumta kila rakhe noh mynta ka sngi.
Ki Block kiba la rakhe ia ka sngi kyrpang ki kmie ki kynthup ha Nongpoh kaba don ia ka kong Rona Khymdeit kum ka MDC jong ka party NPP, ha Pynursla Block ba don ka Kong Grace Mary Kharpuri ka MDC jong ka Nongshken Constituency bad ha Jowai Block ba don ia ka Kong Violet Lyngdoh kaba dei ka MDC shimet hynrei kaba la rung bad pyniasoh noh ia lade sha ka party NPP.
Haba phai sha ka jingrakhe ia ka sngi ba kyrpang ki kmie ha Nongpoh, kaba la pynlong ha Parish Hall Nongpoh, u MLA ka Mawhati u Bah Charles Pyngrope u la shim ia ka bynta kum u kongsan ha ka jingdon lang ryngkat ka kong Jasmine Lyngdoh kaba dei ka President jong ka NPWF State Meghalaya Unit, ka MDC ka thain ka Kong Rona Khymdeit bad kiwei de ki nongkit kam ka party.
Ha kane ka sngi kum shi bynta ban ai burom ia ki longkmie kiba trei ha ki bynta bapher bapher kiba kyntiew ia ka imlang ka sahlang kila shah pynkup burom ha ka NPWF kila don ym duna ia ka shi spah ngut.
Ha ka jingrakhe ha Jowai Block, u MLA ka Jowai u Bah Wailad Miki Shylla u la shim ia ka bynta kum u kongsan haka jingdon lang bad kiwei de ki nongkit kam ka party nalor kiwei pat kila pynkup burom ruh kumjuh ia ki spah ngut ki longkmie.
Haba phai sha ka jingrakhe ha Pynursla, ka MDC jong ka Nongshken ka Kong Grace Mary Kharpuri kala long ka kongsan ha ka jingdon lang ryngkat u Bah Rahbok Tynsong bad kiwei de ki nongkitkam jong ka party bad ha kane kajuh ka sngi la pynkup burom ruh ia palat spah ngut ki longkmie.
