Shillong, Naiwieng 23: Ka Nongpyiur Welfare Organization (NWO), Upper Shillong ha ka Sngi Saitjaiñ jong ka taïew ba dang shu dep ka la pynkup burom ïa ki samla na ka shnong Nongpyiur, 
Laitmynsaw bad Myrkhan kiba la wan sha khmat ha ka result ba dang shu pyllait shen jong ka eksam Secondary School Leaving Certificate (SSLC) jong ka Meghalaya Board of School Education (MBOSE).
U Bah Hamletson Dohling, MLA ka Mylliem Constituency u la wan ban ïa donlang kum u Kongsan ha kane ka jingïalang pynkup burom ïa ki samla pule ïa kaba la pynlong ha shnong Nongpyiur. Kiwei pat kiba la ïa donlang ki kynthup ïa u Bah B Dkhar, Rangbah Shnong Nongpyiur, Bah L Dkhar, Rangbah Shnong Laitmynsaw bad Bah A Nongkynrih na ka Shnong Myrkhan.
Nangta ki dkhot ka Organisation -Bah M Lyngdoh, President bad u Bah R Thawmuit, Secretary- ki riewrangbah na kine ki shnong lem bad kiwei kiwei. U Bah Hamletson Dohling u la pynkup ia ki samla pule da ki momentos bad ka song pisa.
Ki samla pule kiba la shah pynkup burom ha kane ka sngi ki long -Deisy Thawmuit, Ribansuklin Lyngdoh, Denil Lyngdoh, Teisuklang Dkhar, Mebankitlang Thawmuit, Namebansan Thawmuit, Barnelson Thawmuit, Fullyjoy Thawmuit, Richestfield Dkhar, Dakarabha Dkhar, Kynsaibor Lyngdoh, Airisha Rapsang, Kularskhem Rapsang bad i Baiaipyntngen Thawmuit.
U Bah Hamletson Dohling haba ai jingkren u la pynpaw ka jingai khublei kyrpang ïa ka NWO kaba la pynlong ïa kane ka prokram ban ai mynsiem ïa ki samla pule. “Ban poi sha ka thong ym don lynti da kiwei kiwei pat lait na ka jingtrei minot bad pynleit jingmut la ka long ha ka pule puthi ne kiwei kiwei pat”, la ong u Bah Hamletson Dohling.
U la kyntu ïa ki samla ba kin nang ïai trei minot ha ki jingpule khlem da klet ïa ka akor ka burom. “Phi dei ban long borabor kiba don ka mynsiem ba ym dei ban pyndem khlem da ïa aireng ïa ki jingeh bad haba phi poi sha ka thong wat ai ba ka jingsarong kan jop hynrei long borabor kiba sngewrit bad pyni nuksa ïa kiwei pat ki para samla da ka burom ka akor”, la ong une u nongmihkhmat.
