Nongpoh, Nailar 22: Ka All Meghalaya Adhoc Upper Primary School Teachers Association (AMAUPSTA) kala pynkynmaw ia ki jingeh kaba kila dep ban phah sha u Myntri ka tnat pule puthi ka sorkar jylla, halor ka jingeh jong ki nonghikai kaba ym pat lah satia ban leh eiei halor ka jingdawa ban pynkiew tulop.
Kum ka seng kala buh biang ia ka jingkyrpad bad jingdawa sha ka sorkar jylla ba kan sngew kan sngap noh ia kane ka jingud jong katei ka synjuk treikam ki nonghikai. Ia kane ka jingkyrpad la leit buh ha u snem 2019, ba la phah ia ka jingthoh sha u Myntri ka tnat pule puthi.
Halor katei ka jingeh kum ki nonghikai kila iakren ruh markhmat bad u Myntri Rangbah Conrad K Sangma bad na ka liang kitei ki Myntri ka sorkar jylla ki la kular ban pynurlong ia kaei ba ka Association ka dawa, namar la ka hok katkum ka kam ba ki nonghikai ki dei ban ioh.
Kane ka jingdawa ki nonghikai ka dang sahteng haduh mynta la pynsngewsngew u bah Corensius Manih, Vice President ka AMAUPSTA, u la ong bad iathuh ba ia katei kajuh ka mat jingdawa jong ka Association, la rah bad iakren ha ka Iingdorbar Thawaiñ ka sorkar jylla ha u bnai Lber, 2020 hynrei namar ka jingwan lynshop noh ka khlam jingpang Covid-19.
Kumta ka Association ka kyrpad biang sha ka sorkar jylla bad pynkynmaw ia kaei ba la iakren markhmat bad ki ar ngut ki Myntri, kata u Myntri ka tnat pule puthi bad u Myntri Rangbah ban pynurlong noh ia ki katto katne ki mat, kum ka jingkyntiew bainong ne tulop bad ban siew bainong ruh man ba kut u bnai.
La ong ba ka jingbym ioh tikna ia ka bainong man la u bnai ruh ka dei kawei pat ka jingeh ba ki nonghikai ki ju mad na ka por sha ka por, namar kin ym lah satia ban pyndap pynbiang ia ka iing ka sem, kiba ki jinglut ba man la ka sngi ki ktah ia ka ioh ka kot bad wat haduh ka pyrkhat pyrdaiñ jong ki nonghikai.
U Bah Corensius u la kyrpad ruh ia ka sorkar lem bad ki dkhot sha ka Iingdorbar Thawaiñ ka jylla ba kin iatai sani biang ia kane ka mat ha ka sien shong dorbar ba mynta u bnai Nailur, 2021 bad kyrmen ba kiei kiei ki ban sa iakren ha Iingdorbar Thawaiñ na ka bynta ka jingbha jong ki nonghikai Upper Primary.
