Shillong, Nailar 08: U Bah Banteidor Lyngdoh, MLA ka Mawkynrew Constituency bad uba dei ruh ha kaj
uh ka por u Myntri ba dei peit ia ka tnad Agriculture, Sports ka Sorkar Jylla, ha ka sngi Thohdieng u la pyllait ia ka skhim Special Rural Work Programme (SRWP) 2019-2020 ha ka wat kaba ar.
Kane wat ba ar ka jingpyllait u Myntri ia ka skhim SRWP 2019-2020 kaba long lyngba ka Mawkynrew C&RD Block ka la kot sha ka T. 47,90,000-/ . Ha ka wat ba nyngkong u Myntri lyngba kane ka skhim SRWP u la pyllait haduh kumba T.55,43,000/-.
Ha ka jingialang ba u la lum ha ka sngi Thohdieng, u MLA u la pyllait skhim ban tei ia ka iing skul ka Lumsain SSA LP School, Mawlali, ban thaw ia ka ban um ha Ryngkon Thynroit, ka jingpynheh ia ka surok (CC Road) ha Thangsning, ka jingshna ia ka lynti iaid kjat (CC Footpath) ha Mawlein, ka jingkieng (CC Bridge) ha Pingwait.
Nangta ka jingshna ia ka ing skul Nongsohphie ha Laitkyrhong, ka surok iaid kali ha Siangkhnai, ka jingshna ia ki kamra skul RKMS ha Laitdiengsai, ka jingpynbha ia ka skul ha Laitlum, ka jingshna ia ka iing skul Lam Jingshai ha Wahshong, Jongksha.
U Bah Banteidor u la mang skhim na ka bynta ka iing ban pynlong jaka ri khyllung (creche) ha Khapmaw, ka jingshna ia ka ia ka RCC Footbridge ha Wahspung, Wahlakhiat, ka jingshna ia ka RCC Footbridge ha Wah Jrongsi, Wahlakhait, ka jingshna ia ka RCC Footbridge ha Wah Lamet, Wahlakhiat bad ka RCC Footbridge ha Wah Umwad, Mawkria.
Ha kane ka sngi la ia donlang ki nongialam shnong, ki bor pyniaid skul bad kiwei kiba dei ban ioh myntoi na kane ka skhim kaba u MLA u la bhah lang.
Haba kren ha kane ka jingialang ba lyngkot, u Bah Banteidor u la ong, “Ka jingkyntiew ia ki kam pynroi ka dei kawei na ki thong ba ha khmat kaba nga la buh naduh ba la phi la tynrong ha nga ia ka kam kum u nongmih khmat”.
“Nalor kane ka skhim na ka liang jong nga kum u MLA, ki dang bun sa kiwei ki kam pynroi kiba nga la pynkhreh ban pyniaid sha khmat ha ka Constituency ia kiba la sahteng na ka daw kane ka khlam COVID-19”, u la ong.
“Da kaba ai khublei ia ki ba la wan sha kane ka jingialang, u la ong, “Nga angnud ia ka jingiatreilang na ka liang jong phi bad ki paidbah nongshong shnong ka Mawkynrew Cosntituency khnang ba ngin ia kiew lang sha khmat kumba long ha kiwei kiwei ki constituency”, u la ong.
