Shillong, Risaw 15: Ka tnad Anaesthesiology ryngkat bad ka jingiatrei lang bad ka CNE NEIGRIHMS ka la pynlong ia ka Ka lympung iamir jingmut ha ka jingsumar ‘Palliative Care’ bad “Communication Skills – Bridging the gap” .
Ka Gilly Burn, kaba dei ka nongialam khmat jong ka Palliative care na Ri Bilat ka la long ka kongsan. Ka dei kawei na ki nongialam ban seng ia ka Indian Association of Palliative Care, bad ka dei ka riew shemphang ha ka Palliative Care Society ha India.
Ki jingiakren ki kynthup ia ka jingmut jong ka “Palliative care” bad kiwei kiwei de. Ka la don ruh ka jingpyni phlim kaba pynshong nongrim ha ka jingjia ba shisha, shaphang uwei u samla ba 27 snem ka rta uba ioh ia ka jingpang bampong, bad ki jingjynjar kiba u hap ban mad khnang ban jop ia katei ka jingpang.
Ki nongiashim bynta ha katei ka lympung ki kynthup ia ki doktor, ki Medical Social Worker bad ki Nurse na ki hospital kiba bun. U Director ka NEIGRIHMS, u Prof (Dr.) D.M. Thappa u la long u symbud kongsan. U ai jingiaroh ia ka bynta ki nurse ha ka Palliative care, khamtam ha kito kiba don ha ki bynta ba khatduh jong ka jingpang.
“Donkam ban don ka jingsngew isynei ia kine ki nongpang.” U la kren halor ka jingjynjar kaba iakynduh kum ki nongpang ba ioh ia ka jingpang bampong. Kaba kham jynjar haba lap ia kane ka jingpang ka dei ha ka por ban iathuh ia ka khubor bad iathuh ia ki shaphang kaei ka ban sa wan.
U la pynkynmaw ruh ia ki nongshim bynta ban ai jingkyrmen ia u nongpang barabor lada long katba long bad ban iarap ban ai mynsiem ban ieng bad ban ialeh pyrshah ia kaei kaei ka ban sa wan. U Deputy Director haba kren ha katei ka lympung u la ong wat lada ki doktor ki leh ia ka kamram ba kongsan hynrei bunsien ki nongpang ki phai sa ki nurse.
Ha ki por ba dum tam ha ka jingim jong ki, ka don ka jingdonkam ban pynlong jaijai bad ai jingpyntngen na ka liang ka Palliative Care. U Prof. (Dr.) P. Bhattacharya, u khliehduh ka tnat Anaesthesiology bad u I/C Palliative Care Unit ha NEIGRIHMS u la kren ba kane ka CNE kam dei tang ka lympung ai jinghikai hynrei ka dei ban don ka jingpyntreikam ka bashisha jong kine ki jinghikai bad kum ki briew ngi dei ban nang ia kiei kiei bathymmai na kine ki lympung iamir jingmut, ban mlien ban pyntreikam ia ki.
La ong “Ale ngin ia wan lang ban ia kit lem ia ka jingkit bakhia jong kine ki nongpang, to ngin ia don bynta lang ha ki jingkmen bad jingsngewsih jong ki briew kiba ioh ia ka jingpang bampong.” Ka la don ruh ka Panel Discussion halor ka jingbunjaid (diversity) jong ka Palliative Care ha ka sngi kaba ar. Ka CNE Bulletin kaba shisien shisnem la pyllait ruh ha kane ka jingialang.
Ka kongsan ka la ong ruh ba ka long kaba shit rhem bha shaphang ka jingiakren ban ai jingtip ha ka jingsumar ia ki nongpang. Ha ka hi, ka Palliative Care ka dei kaba ka shim khia bha shimet. Ki Nurse ki don ka bynta kaba kyrpang ha ka ban don ka jingsngewlem haba ki nongpang ki iohsngew ia ki ktien khor na ki doctor bad ki nurse.
Kine ki jingai jinghikai kim dei shaphang ki jingtip bakyrpang (technology). Ka kor (machine) ka dei hi ka kor bad lah ban ai jinghikai iano iano ruh ban pyndonkam ia ki kor. Ka jingshisha hi ka long ba ym lah ban hikai ia u shrieh ban long uba don jingsngewlem. Dei na kane ka daw ki nurse ki long kiba donkam ha ka Palliative Care. Ka la kyntu ia ki nurse kiba don ha katei ka jaka ban leh ei ei ka ban pyndon ka jingkylla ha ka jingim kine ki briew.
La pynlong ruh ia ka Bike Rally na Polo sha PB bad nangta pat sha NEIGRIHMS ha ka 13 tarik u Risaw ban ai jingpynsngewthuh sha ki briew jong ka Thain Shatei lam Mihngi halor ka Palliative care. Ka la ruh ka Musical Concert kaba la long ha ka NEIGRIHMS Auditorium ban pynmih pisa na ka bynta ki nongpang kiba ioh ia ka jingpang bampong.
