Mairang, Risaw 31: Kum shibynta jong ka jingrakhe ia ka Rastriya Ekta Diwas (National Unity Day), ka ophis jong ka District Sports Officer, West Khasi Hills District, Nongstoin ha ryngkat ka jingiatreilang bad ka District Sports Promotion Society, West Khasi Hills District, Nongstoin hynne ka step ka la pynlong ia ka jingmareh marathon kaba la tip kum ka Run For Unity ia kaba la sdang na ka ophis jong u Deputy Commissioner ka Eastern West Khasi Hills District, Mairang.
Ha kane ka jingmareh marathon kaba 8 Km ia kaba la plié da u Additional Deputy Commissioner ka Eastern West Khasi Hills Distict, Mairang, u Bah A. Nongbri ha ka jingdon ryngkat jong u District Sports Officer ba dei peit ia ka West Khasi Hills District, Nongstoin, i Kong B. Syiem bad ruh ki nongtrei ka tnat sports, la sakhi ia ka jingwan iashimbynta jong 57 ngut ki nongmareh marathon kynthei bad shynrang ka thain.
Na ka liang ki shynrang, ia ka namjop ba nyngkong, la ioh rah da u Shainingstar Marwein, ia ka namjop ba ar la ioh rah da u Rahjopkordor Lyngdoh bad ia ka namjop ba lai la ioh rah da u Mebansainborlang Pathaw , katba, na ka liang ki kynthei, ka Ibashongkun Kurbah ka la jop ia ka kyrdan ba nyngkong, ka Laaihun Hoojon ka la jop ia ka kyrdan ba ar bad ka Nerisa Nongrum ka la ioh rah ia ka kyrdan ba lai.
Ki nongjop ba nyngkong, ba ar bad ba lai jong kane ka jingiakob mareh marathon ki la ioh rah ia ka song pisa kaba lai hajar, ar hajar bad shi hajar tyngka. La sam consolation prize ruh mar san spah tyngka sha ki nongjop ba wan ba saw, ba san, ba hynriew, ba hynniew, ba phra, ba khyndai , ba shiphew bad ba khatwei.
