Shillong, Iaiong 10: Ka Tnat Commerce bad Industries, jong ka sorkar jylla hynne ka sngi ka 10 tarik ïaiong ka la sdang ia ka jingai jinghikai ia ki samla kiba thrang ban pyntbit ia lade ha ka kaban Pynbha briew ne ka Make-up ha Youth Hostel Shillong.
Ha kane ka sngi la ia don ryngkat lang u bah M. L. Wanshnong, Joint Director ka tnat Commerce bad Industries, u Shashank B. Dash, SPIU Team Leader, u Bah. A. Malngiang, General Manager, District Commerce bad Industries Centre, Shillong bad Deputy Director ka Directorate of Commerce bad Industries ha kane ka sngi la don lang ruh da ka kong Elizabeth Mukhim ka ban long ka nonghikai ia kine ki samla ki ban wan sha hikai.
Ka Kong Elizabeth ka dei ka wei na ki longkmie na ka jylla kaba la pyndep ia ki jinghikai bapher bapher kum na France, Thailand,bad Singapore, ka Kong Mukhim kan long ka wei na ki nonghikai sha ki 50 ngut ki samla ki ba wan ban shah hikai.
Haba ia kren bad ki lad pathai khubor u Deputy Director ka tnat Commerce and Industries u bah Winfred Warshong u la iathuh ba ka thong jong ka tnat ka long ban ai lem ka kti ka mon ka kti ka diang ia ki samla jong ka jylla ban ieng ha la ki jong ki kjat.
U Deputy Director u la iathuh ba ka tnat ka la sdang ia kane naduh kine ki snem ba la dep bad lyngba kane shibun ki samla ki la ioh ban sdang kam seng jam bad ai kam ruh sha kiwei.
