Shillong, Lber 08: U Myntri Khynnah jong ka sorkarpdeng ba dei khmih ia ka Tnad Pule Puthi bad DoNER, Dr SukantaMajumdar mynta ka sngi u la pliepaidbah ia ka roadshow halor ka kam khaii bad ka jingbei tyngka ha ka thain shateilammihngi ha ka nongbah.
U Dharmvir Jha, Statistical Adviser, tnad Development of North Eastern Region lem bad ki nongmihkhmat na ki jylla ka thain shateilammihngi ki la iashim bynta ha kane ka jingialang.
Ia ka roadshow la pynlong ha ka jingiatreilang bad ki sorkar jylla jong ka thain shateilammihngi, FICCI (Industry Partner), bad ka Invest India (Investment Facilitation Partner).
Ka Kolkata roadshowkadei ka roadshow kaba khyndai kum shi bynta ki kam shuwa ka summit jong ka North East Investors Summit bad ki don ki jingpynshaina ki nongmihkhmat jong phra tylli ki jylla ka thain shatei lammihngi.
Ki jylla ki kynthup Arunachal Pradesh, Assam, Manipur, Meghalaya, Mizoram, Nagaland, Sikkim bad Tripura. Ki roadshow kiba la dep ha Mumbai, Hyderabad, Kolkata, Bengaluru, Ahmedabad bad Chennai ki la sakhi ka jingiashimshitrhem ki briew.
Ha ka jingplie paidbah ia ka roadshow, u Dr Majumdar u la ong, ka West Bengal ka long ka khyrdop sha ka thain shateilammihngi jong ka ri, ka plie lad ia ki kam khaii pateng, kam logistic bad kam ba iadei bad ki karkhana.
U la ong ba ka Act East Policy bad ka North East Industrial Development Scheme (NEIDS) ki la pynkhlain ia ki jingiadei, pynthikna ka jingiaid beitiaidryntih ka jingpynkit ia ki mar, ki kam ai jingshakri bad ka pisa bad ka kad lieng ha ka nongbah, ki lynti rel bad ki surok kilong u budlum jong ki kam shalan mar ka thain shateilammihngi ba kynthup ia u slasha, ki muslimusla, ki tiar shna kti bad ki mar organic.
U la bynrap, namar ka jingtbit ka Kolkata ha ka kam shna tiar, kam pisa bad ki jingdon jingem digital, ka iarap ban kyntiew ia ki jingiatreilang ha ki kam kum ka bording ba lah ban pynthymmai, kam jngohkai, bad kam ai jaka sah ia ki nongleitnongwan, IT bad ka ioh ka kot ba iadei bad ka digital, kam rep bad ki kam ba iadei bad ka rep ka riang bad kam ialehkai bad jingpynbyrnia.
Ka thain shateilammihngi ka don 40% ka lad pynmih bording hydro jong ka India bad namar kane ka don ka bynta kaba heh ha ka jingkylla ka India sha ki kam bording ba khuid.
U Myntri sorkarpdeng u la ban ia ki lad ba bun ba don ha ki jaka ba itynnad kum ka Tawang, Sohra, Majuli bad Loktak Lake kum ki lad na ka bynta ka eco-tourism. U la kren ruh shaphang ka lad ban shalan mar na ka thain shateilammihngi, khamtam u slasha organic, u khaw saw, u shynraiLakadong bad ki soh ba phylla, ki tiar ba shna na ki siej bad ka kam thain jain.
U Dr Majumdar u la ban jur ban pynkhlain ia ki artylli ki thain – ka West Bengal bad ki jylla ka thain shateilammihngi ban pynlong ia kine ki artylli ki thain ki nongrim jong ka jingkylla ka ioh ka kot jong ka India bad kyntu ia ki nongbei tyngka.
Ka long bad kiwei kiwei kiba don bynta ha kane ka kam ban saindur thymmai bad pyniasoh da kaba pynthikna ka jingkiew ka ioh ka kot ha kine ki artylli ki thain kum ki kor ba kongsan jong ka jingkiew shaphrang ka India bad ialam lynti ha ka Viksit Bharat, ha kaba ka jingseisoh bad ka jingai bynta lang ia baroh ka ai ia ka lynti shakhmat.
U Myntri sorkarpdeng u la kren ruh shaphang ka jingkylla ba ka thain shateilammihngi ka mad hapoh ka jingialam jong u Myntri Rangbah duh Narendra Modi, kum ka jingkiew ka jingdon ki kad liengsuin sha ka 17 shuwa u 2023 na tang 9 tylli ha u 2013 bad ka jingsdang ia ka Uttar Poorva Transformative Industrialisation Scheme (UNNATI, 2024) da ka DPIIT ha ka jingiatreilang bad ki Jylla ha u snem 2024 ha ka jingbei tyngka kaba T. 10,037 klur.
U Jha u la labatai shaphang ki kabu ba bun ba don ha ka thain shateilammihngi, da kaba kdew ia ki kabu, ki jingdon jingem ba iadei bad ka rep ka riang, kam jngohkai bad ki kam ai jaka sah ia ki nongleitnongwan, ki jingdon jingem ba iadei bad ka bording ba lah ban pynthymmai, ki jingdon jingem na ka bynta ka leit ka wan, ki sienjam wanrah jingkylla.
Ki jingdon jingem bad ki kam logistic, ki kabu ba don ha ka kam rep bad ki kam ba iadei bad ka rep ka riang, ka jingkyntiew ia ka pule puthi bad sap treikam, kam pynbyrnia bad kam ialehkai ruh kumjuh.
Ki Jylla ’Ashtalakshmi’ ki pyni ia ki lad bei tyngka ha ki kam bapher bapher, ba kynthup ki jingdon jingem bad ki kam logistics, kam rep & ki kam ba iadei bad ka kam rep, IT & ITES, kam bording, kam ba iadei bad ki jain, kam jngohkai and kam ai jaka sah ia ki nongleitnongwan, pule puthi bad kyntiew ia ki sap, kam ai jingsumar, kam pynbyrnia bad kam ialehkai. Kane ka roadshow ka don ruh ki jingialang B2G (Business-to-Government), ka rynsan ba kyrpang ia ki nongbei tyngka ban ioh iakren markhmat bad ki nongmihkhmat na ki jylla bad peit ia ki lad kiba don ha ki kam bapher bapher ha ka thain shateilammihngi.
