Shillong, Kyllalyngkot 19: Mynta ka sngi u Deputy Commissioner jong ka West Khasi Hills District u la pynmih ia ka jingpynbna ba la khang pyrshah ban rah pisa palat ia ka T.50000 tyngka, ksiar ne Rupa khlem da don ia ki kot ki sla kiba biang.
Ia kane la pynbna namar ba kala trei kam ka Model Code of Conduct bad kane ka hukum kan neh haduh ban da dep ka elekshon sha ka iing dorbar thawain ka jylla kane ka long katkum ka hukum kaba la pynmih mynta ka sngi.
La mana ruh ba ymbit ban tah poster ha ki kynroh ne kano kano ka dur ba dei jong kano kano ka seng sain pythei ban wah ha ki jaka paidbah khlem ioh jingbit na ki bor kiba dei peit. Kane ka hukum ka long ruh iaki paidbah ban nym tah dur ne wah kano kano ka dur ba ia dei bad ka elekshon khlem jingbit.
Lada don mano mano ba pynkhien ia kitei ki kyndon kin shah pynshitom hapoh ki kyndon jong ka ain, lada don kino kino kiba shah ktah da kane ka hukum kin ia kynduh ia ki bor ba dei peit lada don kam ban pynkylla ia kane ka jingbthah.
