Shillong, Lber 19: Dang shen ha ka dorbar mang tyngka ka sorkar la sakhi ia ka jingiakren iatai ki dkhot ka Ingdorbar thaw aiñ ka jylla haba iadei ka jingjaboh ka lyer ha Byrnihat kat kum ka kaiphod ba pynmih da ka kompani Swiss IQAir ka kdew ba ka lyer ha Byrnihat ka long kaba pynjakhlia tam ha ka pyrthei.
Halor kane ban sngewthuh khambha bad ban wat jingtip na ki briew katei ka thaiñ u nongthoh khubor u la hiar sha katei ka jaka ban ioh ia kren bad ki nongshong shnong ha ka 17 tarik lber 2025.
Haba ioh ban iakren bad ki nongshong shnong ka shnong Dehal ka shnong kaba don ha syndah ki karkhana ki la pynpaw ia ka jingshem jingeh jong ki haba iadei ka jingeh ban ringmynsiem namar ka jingjur ka jingsma kaba mih na ki tyndong pynmih lyer jakhlia ki karkhana ba bunjait.
Kiba don ha katei ka thaiñ, ki la pynpaw ba namar ka jingleh bym suidniew kitei ki karkhana, ki nongshong shnong ki don ha ka jingeh kaba khraw na ka jingmih ka tdem na ki karkhana bad ka pynlong ba ki shem jingeh wat ban ring mynsiem.
Ki ki karkhana ki don ha syndah ka wah Umtrew bad hapdeng kine ka don ruh ka skul ba ki khynnah ha ka thaiñ Byrnihat ki ioh ia ka jingnang jingstad ha ka ban pule kot, haba ia iakren bad u wei u nonghikai ba la rangbah bha ka skul Don Bosco Hr Sec School Byrnihat u bah Paul Nongrum u la pynpaw ba ka jingjaboh jong ka mariang ha ka thaiñ Byrnihat kala jur bha ban ia khyndiat snem mynshuwa.
Ka jingdon jong ki karkhana saiñ-nar, ym ba ka pynjaboh ia ka lyer bad ka jingsawa kaba la ktah ia ka skul kaba don ha jan. U bah nongrum u la pynpaw ki karkhana ki long kiba donkam bad ki ba ai jingmyntoi ruh hynrei ki don pat ki jingktah bad ki ba pynlong ban wanrah jingduh jingmyntoi, namar kane ka karkhana shna wine ka la long ar-lar shah ka jingsniew ka mariang namar ka la pynsniew ia ki umdih ka lyer ba ki ring mynsiem.
“Ka jingsma ka lyer ba mih na ki factory ha Byrnihat ka long palat ia ka jingsma ka jyndem ba shna kyiad, kumjuh namar ka jingpyntuid um ki karkhana ha ka wah ka la don ka por ba ki dohum bad ki jingthaw ba im ha um ki pang wat haduh ba ki la iap ruh, ka sorkar ka la dei ban shimkhia ban leh eiei kum ban pynduna ia ka jingsma, ban pynduna ka jingdon u pum pum” la ong u bah nongrum.
Haba iakren bad ki khynnah skul kiba pule ha ka skul Don Bosco Hr Sec School Byrnihat ki la ong ba namar ka jingsma kaba wan na ki karkhana, haba shong ha kamra klas kim lah bha ban shah shkor ia ka jinghikai ba ki nonghikai ki ai ha kamara klas. Ki nongshong shnong ka thaiñ Byrnihat ki buh ka jingkyrpad ba ka sorkar kan leh eiei noh khamkloi khamtam lei ba don ka skul hajan ki karkhana.
