Shillong, Nailar 06: U Myntri Rangbah ka jylla u Conrad K Sangma la pynren jur ia ka jingshah thang ka Indira Gandhi Cultural Centre ha Dhaka bad ka jingshah pynpra u dur mot jong u Tirot Sing Syiem ka hima Nongkhlaw bala buh nam ha katei ka ri.
U Myntri ka Tnad Arts bad Culture Bah Paul Lyngdoh ula pynthikna ia ka jingshah pynpra u mot sah jingkynmaw jong u Khla wait ka Ri-lum Khasi Tirot Sing Syiem, uba pynieng ha phyllaw ka Indira Gandhi Cultural Centre ha Dhaka.
Une u mot u dei uba dang shu plie ha ka 16 tarik Rymphang hynrei ula shah pynpra ha ki kynhun nongiakhih ka Ri Bangladesh-kaba don mynta hapdeng ka jingiaumsnam- kiba la thang dusmon ruh ia ka Indira Gandhi Cultural Centre.
Haba kylli, u Bah Paul ula ong ba nga dang shu iohi ia ka video bala phah da uwei u nongpathai khubor kaba pyni ia ka jing shah pynpra dusmon ka IGCC bad ruh u mot jong u Tirot Sing Syiem.u la ong ban nga dang shu dep peit ia ka video dang 5 minit eiei.
La ong ba katei ka jingiakhih ka dei ka jingiakhih pyrshah ia ka Ri India namar ha kane ka jingiakhih, kila hiar thma ia ka Indian High Commission Cultural Centre. Naba une u mot sahnam la pynieng ha phyllaw ka Centre, kumta ula shah dusmon lang ha kine ki kynhun.
U la ong ruh ba kat kum ka video la sakhi ba u mot ula shah pynpra phom hynrei tang u maw thoh kyrteng jong u Tirot Sing u dang don kumba u long, kane ka jingleh ka dei ka jingleh riew khlaw jong ki nongiakhih hapoh katei ka ri Bangladesh.
