Shillong, Naitung 19: Ka United Hynñiewtrep Movement Central Executive Council ka sngew ban pynrem jur halor ka jingshah thombor u nongialam rangbah ka seng u Bah Charlie J Rani haki riew thrang snam kiba la thmu ban shim syndon iaka jingim jong u.
Ha katei ka jingjia kiba la don ryngkat kiba dei na ka seng ki long bad kiba la thmu ban rah lang ki long ia u Sports Secretary Samla Michael B Dkhar bad kumjuh ruh ban kit jubor ia u Assistant Organising Secretary Bah George Iawphniaw kata ruh haka por mynstep 11 baje.
Katkum ka jingshong meeting kyrkieh jong ka seng mynta ka sngi kata 18 Naitung 2022 ka la ioh ruh ban leit ai syndon da ka dorkhas sha u Superintendent of Police bad ba u lah kular ruh ban shim khia halor kane ka bynta.
Hakawei ka liang ka seng ka buh jingkylli ia kine ki riew thrang snam ba ha kano ka rukom ki nud ban leit thombor kata ruh mynsngi mynshai kata ruh ha ing sah jong U Nongialam rangbah jong ka seng, kaei kata ka daw ba kin hap ban leit thombor ia u nongialam ka seng.
Ka UHM ka ong ba lada don kano kano ka daw ruh haka jingshisha paradoh parasnam dei ban ia pynbeit da ka ktien iaki jing duna jing bakla ym ban shu leh donbor lane ban shim iaka aiñ ha kti. Namar kum ki briew baroh ki tip shai ba ka aiñ ka don bad ba lada u Nongialam jong ki u lah leh ne kren kano kano ka ban ktah mationg iaki ki dei ban leit ujor sha ka aiñ.
Ka seng hi ka sngew ban kyntu iaki bor ka aiñ ba kin shim khia bad ban pynsted ban kem iakine ki riew thrang snam bad ban pynshitom iaki kat kum ki kyndon aiñ, ka seng hi baroh kawei ka sngew ban ai ruh ka khubor sngewlem sha ka ing ka sem jong u Nongialam Rangbah ba un ioh noh ia ka meit kaba koit ba khiah, la ong u bah Moonstar Nongrem na ai ktien ka seng UHM.
