Shillong, Nailar 23: Mytna ka sngi ka party HSPDP kaba don lang ha ka sorkar MDA ha ka jingialang jong ka Central Executive Committee kila shim ia ka rai ban pynrem ia ki pulit kiba la siat iap ia u bah Chersiterfield Thangkhiew u General Secretary ka seng lehnoh HNLC bala wan ban pyndem ban im noh ia ka jingim kuba long lem ki paidbah nongshong shnong.
Haba kren ha ki lat pathai khubor u president ka seng u bah K P Pangniang u la ong ba kum ka party ka pdiang sngewbha ia ka rai jong ka sorkar ban thung ia ka Judicial Inquiry ban tohkit ia katei ka jingjia ban lap ia ka jingshisha baroh ia kaei kaba la jia ha ka 13/8/2021.
Kum ka party ka pdiang sngewbha ia ka rai jong ka iing ka sem jong u bah Cheris ban ap ia ka kaiphot jong ka Judicial Inquiry bad la kyrpad ia ki paidbah jong ka Mawlai ban iatrei lang ban lap ia ka jingshisha halor katei ka jingjia baroh.
Ha kane ka jingialang mynta ka sngi kila iakren ruh ia ka kam pud kam sam kaba ka party ka iing halor ka nongrim ban pynbeit noh ia u pud u snem hapdeng ka jylla Meghalaya bad Assam, kum ka party ka ai khublei ia u mytnri rangbah u ba la shim khia ia kane ka kam ha kaba u la shim lang ia baroh ki seng sain pyrthei bad ia ki District Council.
Ha kane ka jingialang ka party kala shim ia ka rai ban dawa na kane ka sorkar MDA ban wan rah ia ka ai da ka sorkar hapoh iing dorbar ban pynkylla ia ka para 12A(b) jong ka khyrngit kaba hynriew jong ka Riti Synshar ka Ri India, ban weng noh ia ka ktien President bad ban pynrung da ka ktien Governor kumba long ka jylla Assam.
Kan long kaba eh ia ka jylla Meghalaya ban ia kren bad ka Parliament lada don kam ban nym pyntrei kam ia ki katto katne ki ain hapoh ki jaka jong ki District Council, hyrnei lada ai noh ia kane ka bynta sha u Lat jong ka jylla kan kham suk ban ia kren dei halor kane ka nongrim ba ka party ka dawa na ka sorkar ban shim ia ka rai hapoh ing dorbar.
