Shillong, Rymphang 15: U Bah John P Syiemiong Secretary jong ka shnong Umiam, u la iathuh ba ia ka dorbar shnong kaba la buh ban pynlong mynta ka sngi ka ophis jong u Syiem ka Hima Mylliem kala pynsangeh noh.
Haba kren ha ki lat pathai khubor mynta ka sngi ha Shillong Press Club, u Bah Syiemiong u la ong ba ha ka 21 tarik u bnai Kyllalyngkot 2020 u la phah ia ka jingpyntip ban pynlong ia ka dorbar shnong mynta ka sngi, hynrei ha ka 13 tarik mynta u bnai pat la phah shithi ban pynsangeh shuwa ia kane ka dorbar kaba la dep ban pynbna.
U Secretary jong ka shnong u la ong ba ka jingiathut hapoh ka shnong kala sdang naduh u snem 2017 bad dei tang ha u snem 2019 ba ka Hima Mylliem kala pan ia ka kaiphot na u Syiem Riad Mawbuh ha kaba ia dei bad ki kam shnong hapoh shnong Umiam ha kaba u Syeim raid u la phah sha ka hima ha ka 4/11/2019.
Kaba sngew lyngoh ka long ba mynta ka kynti na ka liang jong ka Hima kala pan shuh ia ka kaiphot ha kaba ia dei bad ka shnong, ha kaba ia ia kaba la dep ban ruh khlem pat shim kam ei ei, ka jingkylli ka long sa ka kaiphot kaba kumno u syiem raid u hap ban phah.
Ka jingujor jong kit kam shnong pyrshah ia u rangbah shnong u Bah Twinkle Buhphang ka long halor ka jingai NOC ia ki 17 tylli ki karkhana kiba don ha Umiam da kaba shu leh marwei. Dei halor kitei ba u la leit ban ujor sha KHADC ha ka tand ba dei peit ia ka khaii pateng namar ka pynkhein ia ki kyndon khaii pateng.
Katkum ka shithi kaba la thoh napoh ka Hima ka long ba ka kam rangbah shnong kala kut hynrei haduh mynta ym pat lah ban ioh ia u rangbah shnong, kane kala buh ia ki paidbah nongshong shnong ha ka jingeh kaba khraw ha kaba ia dei bad ka jingai syrnot.
Ha ka 2/01/2020 ka hima kala khot ia ka jingialang hapdeng ki nongkit kam shnong bad u Rangbah shnong ban ia kren ia kane ka kam hynrei na ka liang jong ka Hima kam shym la leh ei ei. Na ka liang jong u Secretary shnong ba ka Hima ka dei ban pynlong noh ia ka dorbar ban ioh ia u rangbah shnong katkum ka ain namar ka Sanad jong u rangbah shnong ba mynta kala dep kut shisnem mynshuwa.
