Shillong, Jylliew 24: U shongknor jong ka iing dorbar ka Khasi Hills Autonomous District Council u Bah Strong Pillar Kharjana u la hap ban pynsangeh shipor ia ka dorbar, hadien ba ki liang pyrshah kila takrain tyngeh ia ka Executive Committee halor ka jingpynrung ia ka jingpynlut shuh ia ka pisa “supplementary expenditure” u snem 2024-2025 ha ka dorbar mang tynka jong u snem 2025-2026.
Kane kala wan ha shwa ba u Seiborlang Warbah EM ba dei peit ia pla pisa jong ka KHADC u mut ban wanrah ia ka mang tyngka jong u snem 2025-2026. Na ka liang u Bah Titos W Chyne u la ieng ban rah da ka point of order katkum ka rule 111, ha kaba iadei bad ka jingwanrah ne bsuh lang ia ka Supplementary Expenditure, ha kaba u la pynpaw ba ha kano ka rukom ka EC ka wanrah namar ba kane pat ju jia ba pynrung ia ka supplementary ha ka mang tyngka.
Ha kajuh ka por ka kong Grace Mary Kharpuri kala ieng ban kyrshan lang ia u Bah Titos, da kaba ong ba kim lah ban pdiang ia kane namar ba ka don ka supplementary expenditure ha ka mang tyngka.
Na ka liang ka liang pyrshah kila dawa ba kidei ban pynbeit shwa ia kane bad ki kloi ban pdiang hadien ba la dep ban pynbeit, bad kila dawa ruh ban pynkut shwa shipor ia ka dorbar namar ba kim kwah ban shah ialam bakla ia ka iing dorbar bad kumjuh ruh ia ka jaitbynriew.
Hadien kane, u bah Strongpillar u la pynbna ba la pynwai shwa ia ka dorbar bad yn ia kynduh biang ha ka por 2 baje. Na ka liang ki liang pyrshah kim pat kren eiei, hynrei kila ong ba kin sa peit hadien ka 2 baje la kin pynbeit ne em.
