Shillong, Nailar 22: Ka seng Hynñiewtrep Integrated Territorial Organisation (HITO), ka pynshai ia ka jingkren jong u Myntri kam poh ïing, jong ka sorkar Meghalaya u bah Lakmen Rymbui, kaba la mih ha ki lat pathai khubor ha ka 12/08/2021, kaba u ong ba ka sorkar India kam pdiang ia ka Instrument of Accession (IOA).
U President ka HITO u bah Donbok Dkhar u la ong ba u sngewdei ban pynshai ia baroh khamtam ia ki Nongmihkhmat ka Khasi Jaintia Hills ba ka IOA & AA ka ka dei ba la soi bad pdiang da u C Rajagopalachari Governor General of India.
Ki arphewsan hima khasi states kum ki hima marwei bad kum ka Synjuk lang ka Federation of Khasi States bad ia kitei ki dulir jingiateh bad ki jingkular la soi u Governor General ka ri India ha ka 17 tarik August 1948 ryngkat bad ki kyndon jong ka Annexed Agreements (AA).
Ka sorkar India ka la pynkheiñ ruh ia ka Standstill *Arangement* kaba 9 August 1948 nangta la pynkhien ruh ia ka jingiakut ha iing u Lat ha ka 16 July 1947 ba ka jingiateh kan neh Ar snem bad wat ia ka IOA & AA Kaba 15 Dec 1947 kaba la pynkylla ka Sorkar India ka la iaid lait lut ia kitei ki soskular kata ka IOA bad ka AA.
Ia ka dulir ka jaidbynriew ka IOA & AA u Sardar Vallabhbhai Patel, u Dy PM u la buh ia kitei ki dulir jingiateh hakhmat ka parliament (constituent assembly) lyngba ka white paper ha u snem 1949 & 1950 ban pyntip ia baroh halor ki jingiateh bad ki jingkular bad ki 565 Hima hapoh Ri India kynthup ki Khasi States. Kitei ki hok ka jaidbynriew ki paw sha ha ka White Paper on Indian State ba la buh hakhmat ka parliament ha ka snem 1949 bad 1950.
Ha kaba ïadei bad kane, ka seng HITO ka buh jingkylli ïa u Myntri Bah Lahkmen Rymbui la hato u tip shai ne em aïu ka IOA ka kren shaphang ka histori ba kyrpang jong ka jaitbynriew Khasi ka bym shim la soi ia ka Instrument of Merger hynrei tang ïa ka IOA bad ka AA kaba lasoi bad pdiang da u Shri. C Rajagopalachari, Governor-General of India bad ka Federation of Khasi States ha ka 17 Aug 1948.
Ka jingdawa ia ka IOA la pynsawa ym tang da ka seng HNLC hynrei bun kiwei ruh ki kynhun kum ka Federation of Khasi State(FKS), Hynñiewtrep Integrated Territorial Organization (HITO), Hynñiewtrep National Youth Front (HNYF) Hynñiewtrep Youth Council (HYC), SOMALA, ka la mih ruh Katto katne na ka Manifesto ki Seng riewlum ha ka dur RPA ha ka election MP-2004.
Ka la mih ruh ha ka BJP -Policy for Meghalaya 1997 ha kaba la kular ba kan burom ia kine ki jingiateh, wat u kpa u Chief Minister u late PA Sangma, Speaker barim ka India ruh u la kren teng ha u snem 2000, hakhmat ki Khlieh Nongsynshar bad ong “IOA must be implemented” shuh shuh sa u late BB Lyngdoh, Chief Minister barim u la ong ” Khasi States are alive” bad kiwei kiwei.
Haba bishar na kiei kiei kiba paw shabar, lah ban ong ba ym dei eh ka sorkar India ka bym kwah lane mon ïa ka IOA hynrei dei ka sorkar MDA ba la ialam da ka NPP kynthup ka UDP, PDF, HSPDP, KHNAM, NCP, BJP, IND, kiba kyntait ïa ka namar ki kynmaw ba ha kato ka por ba ka Dr M. Ampareen Lyngdoh, MLA ka la wanrah ïa ka jingtyrwa halor ka IOA hapoh Assembly, ka MDA ka la kyntait war.
Mynta, ka jingkylli ka long ia ki seng saiñ pyrthei kum ka UDP, HSPDP, PDF, BJP, NPP, NCP kynthup wat ïa ki MLA shimet kaei ka nongrim jong ki halor kane ka phang. Kum ban shu pynkynmaw, baroh ngi dei ban puson bha balei ka Khasi state ka paw ha ka khyrnit ba nyngkong jong ka riti synshar ka ri India.
Ka HITO ka ong ba ki kwah ruh ban iohi ia kita ki dulir kaba ka sorkar India kam pdiang satia iaka IOA kumba la ong da utei u myntri kiei ki nongrim kiba ki kyntait khnang ba ngin iashai haba lieh ba ngin ioh ruh ban pynkhreh ban pan jingiarap na ka UNPO ban ioh iala ka hok jong ngi. U Myntri ka tnad Home u dei ban sei kata ka jingthoh kaba wan na Delhi kaba ong kim treh ia kren halor ka IOA.
Lada lah ban pynmih ia kum kata ka shithi bad jingthoh te kan long ha ba shai ba ka Ri India ka la pynkut pyndam ia kitei ki soskular (Instrument of Accession & Annexed Agreement) ka ba mut ki Hima Khasi ki la long noh la ka jong ka Ri bad ka Ri India kam don hok shuh ban tuklar lane lada ka pyndam ia katei ka dulir ka mut ka pynpaw ba ki jingsynshar baroh ki long ki jingsynshar donbor.
Ka HITO ka kylli hato lah mo ban ia kren IOA tang da u Chief Minister bad Home Minister khlem da don ki trai kam kaba mut ki Syiem, Lyngdoh, Sirdar jong ki Hima Khasi states lane ka Federation of Khasi States?
Ha kawei ka liang ka National Commission for Scheduled Tribes (NCST) ha ka 26 April 2012 ka la rai pynksan ia ki Instrument of Accession & Annexed Agreement jong ki khasi states bad la bud sa ki shithi na u heh duh ka NCST sha u Union Home Minister ka ri India ban pynrung ia ki kyndon iateh kumno une u Myntri kampoh iing ka jylla Meghalaya pat u kren klumar. Shisien sngap te long kumba ka kti kadiang kam tip kaei ka kti ka mon ka leh..!!
Kat kum ki kot kiba paw shai na ka White Paper on Indian States ba la buh da u Sardar Vallabhbhai Patel, hapoh parliament ha u snem 1949-50 ha kaba iadei bad ka FKS bad ki Arphewsan tylli ki Khasi states ki kyntien ha ka *clause 1* jong ka *Annexed Agreement ki ong kumne harum*
” The Federation of Khasi States hereiñafter referred to as “the federation” agrees that all existing administrative arrangements between the Dominion of India and the Province of Assam *on the one hand* and the Khasi States *on the other hand* shall with the exceptions noted below, *continue in force untill new or modified arrangements have been arrived at between the respective authorities concerned.*
Haduh kine ki sngi ym shym la pynbeit hapdeng kitei lai party. Hato bakla mo ka jingbishar na ka NCST ka tnad sorkar kaba la mang katkum ka Article 338A jong ka riti synsar ka India? Ka jingklumar u pud u sam ka Meghalaya dei namar ba khlem pynbeit fulfill ia ki kyndon jong ka IOA & AA ha kaba la shu bsuh donbor ia ki Khasi states hapoh u pud u sam jong ka jylla Assam naduh u snem 1950 bad ba synshar donbor pat lyngba ka ka sixth Schedule.
Shuh shuh lada u Farooq Abdullah, President, National Conference (NC) bad ka Mehbooba Mufti, President, People’s Democratic Party (PDP), baroh ar ki Chief Minister barim ki shai ki skhem halor ka nongrim ka Instrument of Accession ki shai ki skhem halor ka Article 370 ka Jammu & Kashmir, bad lada u Thuingaleng Muivah, General Secretary, NSCN -IM ki lah ban shai halor ka nongrim ka jaidbynriew la jong.
Ka seng HITO ka kylli hato ki president, General Secretary ki Seng riewlum ki Seng national, ki AR ngut ki MP, ki 36MLA, 60MDC ka jaidbynriew Khasi Jaintia hapoh ka bri Hynniewtrep ki skhem ne em, ki shai ne em ia la ka nongrim ba ka dei ban paw shai hapoh ka riti synshar jong ka ri india.
Lada kim shai ka 2023 ka la wan la donkam ia ki paidbah ba kinda pyrkhat sani bha ban ioh jied da ki Seng ne ki nongialam kum ki MP, MLA MDC kiba shai ka nongrim kibym leh rain ban kren skhem halor ka jingiadei kaba kyrpang ( unique history & status) ki Khasi states bad ka Ri India.
Shuh shuh kum u Myntri ka tnad Education u la dei ruh ban shim khia ban pynmih khyrpang ka jingbthah(notification) ba ki skul ki college ki University ki dei ban don ka subject, ki kot kiba kyrpang khnang ba ki khun Hynniewtrep kin tip ia la ka History ba kyrpang.
La dei ban shai kumba shai ka jingdawa ILP ha kaba ka Sorkar MDA ba ialam da NPP (NPP, UDP, PDF, HSPD, KHNAM, NCP BJP bad IND) ki kloi ne em ban wanrah ka resolution hapoh ka Assembly ban bsuh pynpaw pyntreikam ia ka IOA & AA hapoh ka Article 370A. Kine ki party kiba synshar ki dei ban shai kumjuh ki bor KHADC bad JHADC ki party synshar ki kloi ne em ban wanrah ka resolution halor ka IOA & AA.
Dei ban pynshai shwa phi ki Seng synshar ha ka MDA phi kloi ne em ban wanrah da ka resolution halor ka IOA & AA ha ka jaka ban ong ka Sorkar India kam pdiang ban ia kren. Ka Sorkar India te kumba long mynta te ka wit kien ia ngi ha kiba bun ki liang namar ba ngi ia pher naduh ka rukom bat khyndew, Khlaw, Marpoh Khydew.
Ka ktien, ka rukom bam, ka synshar Shnong, Raid bad Hima ne Elaka nadong sha dong ngi ia pher HYNREI kaba kham donkam ka long maphi kien NPP, UDP, PDF, BJP, HSPDP, NCP, KHNAM, INDEPENDENT, phi ia shai ne em phi ia sngewthuh ne em ia ka IOA & AA ban wanrah ka resolution hapoh Assembly ?
Ka Seng H.I.T.O kan sa iaid pynlong jingialang kylleng ban pynshai halor kane ka phang kaba dei kawei naka Ki Jingthmu bad Jingangnud jong ka seng. Ka mat treikam kaba 7 jong ka seng ka long ban ai jingpynshai bad jingïapylliew jingmut halor ka history bapher (unique history) jong ka jaitbynriew khamtam eh ha kaba ïadei bad ka synshar ka khaddar ha kaba ka jaitbynriew ka la soi ïa ka dulir ïasoh bad ka ri India lane ka Instrument of Accession bad kiwei de ki bynta kiba don jingïasnoh bad kane.
Ki paid Khasi ki khlem mynjur ban soi iaka Instrument of MERGER hynrei ki soi tang iaka Instrument of Accession bad Annexed Agreement kaba la soi bad pdiang da u Shri. C Rajagopalachari, Governor-General of India bad ka Federation of Khasi States ha ka 17 Aug 1948, kane ka long katkum ka kyrwoh kaba la phah da u president ka seng u bah Donbok Dkhar.
