Pynshna iing ka kynhun ‘Tei la ka Ri’ ia u Bah Skhem Sohtun ha 11-Mer Mylliem

Shillong, K’lyngkot, 04: Ka kynhun jong ki riewpaidbah kiba shu iakynduh tang ha ka WhatsApp Group ba la ai kyrteng ‘Tei la ka Ri’ ha ka 31 tarik u Nohprah, 2019 ki la plie bad aiti noh ia ka ïing kaba ki la pynshna kyrpang ia ka long ïing jong u Bah Skhem Sohtun, kaba don ha ka shnong Umrakam, 11 Mer, Mylliem.

Ia kane ka ïing la pynshna da kane ka kynhun lyngba u synniang u bynhei ba la noh kylluid mynsiem na ki dkhot jong kane ka kynhun bad na ki riewshimet kiba don ia ka mynsiem ban iarap lem ia la ki parabriew.

Shwa ban aiti ia kane ka iing ba la pynshna thymmai sha u Bah Skhem Sohtun, la pynlong ia ka jingialang ha kaba Working Chairman jong ka kynhun “Tei la ka Ri” u Bah Seiborlang L Nonglait u la iathuh ia ka jingiaid lynti jong kane ka kynhun kaba la shim ia kane ka rai ban leh eiei na ka bynta ki paradoh parasnam kiba donkam shisha ia ka jingiarap lem na ki parabriew kiba don ia ka mynsiem leh bha ia kiwei pat.

U Samla Seiborlang, haba kren ha kane ka jingialang u la ong, ‘da ki lak ngut ki briew ha ka pyrthei ki im khlem ïing khlem sem, hynrei kalong kaba  sngewkmen shibun ba ka jaidbynriew jong ngi ka dei ba la kyrkhu shisha da u Blei  namar ngim don uwei ruh u  paradoh parasnam kiba khlem ïing khlem sem.’

“Ka jingpynshna ïa kane ka ïing bathymmai jong u Bah Skhem Sohtun kam dei eh tang ba ka kynhun ka don ka mynsiem Khristan, hynrei  ka dei  ruh  ba ngi dei ka jaidbynriew kaba tip briew tip Blei naduh u mynbarim, ka mynsiem ïatiplem, ka mynsiem sngew synei ka mynsiem jong ka jingieid, ka mynsiem ban kner ïa ki kti  ban ïarap bad ban kyntiew lem iwei ia iwei pat,” u la ong.

Une u Working Chairman jong ka Kynhun Tei la ka Ri u la iathuh ba ka kynhun ka la kwah ban aiti ïa kane ka ïing ha kane ka 31tarik kaba sa tang shisngi kan kynjoh  sha u wei pat u snem bathymmai ban pynpaw bad long kum ka dak jong ka jingkmen ba kin ïohi ïa ka durkhmat ba phuhmut phuhmat shwa ban jam sha u wei pat  u snem. U la ong ruh ba kane ka  jingkner jong ki dkhot sha ki briew kiba duk kan ym long tang ha ka aïom rakhe ia ka lehniam Khristmas hynrei kan long ha baroh ki saw aïom.

Ha kane ka jingïalang ba la pynïaid da u Bah RK Kharmalki Publicity Secretary la ïoh ruh ka jingduwai kyrpang na u Pastor Lamborne Kharbudon, ka jingkren na u Rangbah Shnong Umrakam u Bah Bansuk Khriem, ka jingkren na ki dkhot ka longïing u Bah Skhem Sohtun, ka jingpynkyntang ïa ka iing na u Pastor Lamborne bad ka jingrwai na ka shnong Mylliem Umrakam kumjuh na i Kong Albina Mawlong.

Kum ka kynhun ka ai khublei kitbok kitrwiang da ka dohnud bakmen baroh ba ka ïing u Bah Skhem Sohtun bad ki khun ki kti jong u kin nang roi ha ka ïoh ka kot bad kin nang  ïoh ka met ba koit ba khiah bad ruh ba kin nang ïai kiew ha ki kyrdan jingpule ha ki sngi bad ki snem ban dang wan.

Ka kynhun ka kyrmen ruh ba kane ka jingtei ïa kane ka ïing kan ïai sah kynmaw ieit hapdeng baroh ki para dkhot bad kiwei pat bad haduh ki pateng ban kumjuh bad ha kajuh ka por ka kynhun ka ai khublei ruh ïa baroh ki paralok parajor naduh ki  khynnah, ki samla haduh ki tymmen ki kro kiba la iadon bynta lang na ka bynta ban noh synñiang sha kane ka long  ïing.

What Next?

Recent Articles

Leave a Reply

Submit Comment

*

Where to buy Vidalista Professional 20 Mg (Tadalafil) tablet