Shillong, Nohprah 18: U President jong 
ka Hill Famers Union (HFU) u bah Commander Shangpliang kaba dei ka seng nongrep ha ka jylla, hynne ka sngi u la pynskhem ia ki nongkitkam jong ka HFU Umthlong, Krang bad ka Nongthliew Unit. Ha kane ka sngi pynskhem pynskhem ia ki nongkitkam jong kine ki 3 tylli ki unit ba la pynlong ha Nongthliew la iadon ryngkat ruh u Bah Allfondbirth Kharsyntiew General Secretary jong ka HFU.
Ha kane ka sngi la ioh ia ka jingkren na u bah Allfondbirth uba la iathuh halor ka jingiakhun jong ka seng ban pynduh ia ka jingot kilo, ka jingbym biang ka um ban rep bad kumjuh ruh halor ka jingdonkam jong ki nongrep ban iatylli ban thaw unti ha man la ki shnong khnang ba ka seng nongrep HFU kan long kaba khlain bad kumjuh ruh ban pyniatylli ia ki nongrep.U bah Allfond u la kyntu ia ki nongrep ban long kiba shemphang ban iatylli bad la kyntu ruh ia ki nongkitkam ban trei shitom na ka bynta ka jingmyntoi jong ki nongrep. u la kren ruh halor ka jingmyntoi bad ba la ioh ban iasaid ia ki jingeh jong ki nongrep ha ka Parliament kaba la tip kum ka 1st Meghalaya Famers Parliament dangshen.
Hadien ba la pynskhem ia ki nongkitkam la ioh ruh ia ka jingkren na u President ba Commander Shangpliang. Ha kane ka sngi la sam ruh ia ki certificate sha ki dkhot jong ka 1st Meghalaya Famers Parliament da u bah Commander Shangpliang. U bah Commander ha ka jingkren u la ong ba ki nongmihkhmat kim ju kren ia ki jingeh jong ki nongrep namar kim sngewthuh ia ka jingeh jong ki nongrep. u la ong ba ki ophisar bad kiwei kiwei ruh kim sngewthuh haduh katno ki nongrep ki iakynduh jingeh.
U la iathuh ba na ka liang jongu bad u Secretary ki la sngewthuh lut nadong shadong ia ki jingeh jong ki nongrep namar kaba bun kip or ki la pynlut na ka bytna ki nongrep bad dei kane kaba la pynlong ia ki ban iakren ia ki jingeh jong ki nongrep ban ban pynsngew sha ka sorkar.U la ong ba lada ka sorkar kam sngap ia ki jingdawa kumba la pynpaw ha ka parliament ki nongrep dalade ki dei ban iatylli bad mih paidbah ban pynsngew ia ki jingdawa na ka bynta jongki hi.
Ki mat ba hakhmat ba ki nongrep ki iakynduh jingeh la ong u bah Commander Shangpliang ka dei ka jingbym biang ka um, ka jingbym biang ki symbai, ka jingbym don ia ka sboh dawai, ka jingbym biang ka dor ka mur, ka jingshah ot kilo, ka jingbym don ia ki iew lait noh ka Iewduh, ka jingbym pyntreikam ia ka crop insurance policy, ka jinghiardor jong u synsar, la tyrpad, ka jingbym don ka ain na ka bynta ki nongrep, ka jingduna ki iew Khappud, ka jjingbym don ki jaka buh ia ki mar rep, ka jingduna symbai, ka jingbym don ki lynti syngkin kiba biang sha ki jaka rep bad bun kiwei kiwei.
U la ong ba ka seng ka dawa na ka sorkar ba ka dei ban pynbna noh ia u snem 2019 kum u snem jong ki nongrep. u la ong ba ka seng kan nym shongthait ban dawa na ka sorkar ban pytriekam ia kitei ki mat ban myntoi ki nongrep bad u ong ruh ba ka donkam ia ka jingiatylli jong ki nongrep ka ri khasi jaintia baroh kawei.
