Shillong, Jymmang 15: Ka National People Farmers Front (NPFF) ka seng ki nongrep ka part National People’s Party (NPP) ha ka jingialam jong u bah HM Shangpliang kum u shongknor kila leit ban ia kynduh ia u symbud myntri rangbah ka Jylla, bah Prestone Tynsong ban pynsngew ha kaba bad ka jingeh ba ki nongrep ka jylla.
Ki nongrep kila wan na kylleng ki bynta baroh kawei ka jylla Meghalaya bad ha kane ka jingiakynduh la pynsngew ia ka jingeh kaba ki nongrep na kylleng ki distrik ki kynduh khamtam eh haba iadei bad u synsar hadien ba ka sorkar ka la pyntreikam ia ka skim CM Assure.
Haba kren bad ki lad pathai khubor, u Bah HM Shangpliang u la iathuh ba kum ka kynhun ki la ioh ruh ban pynsngew ia ka jingud ki nongrep halor ka jingjur palat ka jingbam khniang ki dieng kwai kumta ki kyntu ia u Symbud Myntri Rangbah ban phah da ki scientist ban wad bniah bad kumjuh ruh halor ka jingeh na ka bynta u synsar.
Ha kawei pat liang u la ong ba ki ioh ruh ban pynpaw ka jingsngewnguh ba lyngba ka jingtuklar jong u Symbud Myntri Rangbah mynta ki la lah ban sam ia ki dawai sboh sha ki nongrep.
Kawei pat ka mat kaba ka kynhun ka pynsngew ka long halor ka jingud ki nongri jingri ba kim ju ioh shuh ia ki khun sniang bad khun syiar na ka tnad Veterinary jong ka sorkar jylla. La ong ruh ba ki la ioh ruh ban pynsngew halor ka jingud ki nongrep ba kim ju ioh shuh ia ki symbai na ka tnad ka rep ka riang.
Na ka kynhun ki la pynsngew ruh halor ka jingbym don ki doktor ba sumar ia ki jingri bad kumjuh ki dawai ia ki jingri ha ki veterinary bapher bapher ba don ha ka jylla. La iathuh ba na ka liang u Symbud Myntri Rangbah u la kular ban shong bishar bniah ia kine ki jingdawa kiba ka kynhun ka pynsngew bad ong shen un sa lum ia ki tnad ba dei peit ban tuklar halor kane.
