Shillong, Lber 12: Ka ophis jong ka Deputy Commissioner ka East Khasi Hills District kala pyntip ba bun na ki skhim jong ka sorkar pdeng kum ka skhim sam jingbam lyngba ka ICDS, POSHAN 2.0, CM Care Pensioh, PMAY(G) skhim shna iing, Ka bai bam ki samla pule, ka MHIS Kard, jingtrei na ka MGREGA, Khaw ration, NSAP ka skhim bai bam tynmen, ban ioh LPG bad kiwei ki skhim don kam ban pyniasoh bad Aadhaar.
Kumta la bthah ia baroh ki paidbah kiba khlem pat don Aadhaar kard ba kin leit ban shon sha ophis Deputy Commissioner ha Shillong ne ha ki ophis jong ki Block, ne ha ki post ophis ne ha ki jaka bala pynbeit kyrpang bad kiba wan ki dei ban rah ia ka dur thep vote ne ka syrnot sngi kha.
Na ka bynta kito kiba hapoh ka 15 snem ka rta don kam ban don ia ka syrnot Schedule Tribe Syrnot sngi kha bad ia ka Aadhaar kard jong ki kmie ki kpa, na ka bynta jong kito kiba la don ia ka Aadhaar kard ki dei ban pyniasoh ia kitei ki skhim bad ka Aadhaar kard.
