Shillong, Risaw 02: U Bah Latiplang Kharkongor MDC jong ka Nongthymmai mynta ka sngi u la pynpaw ia ka jingpyrshah ka jong u ha kaba ia dei bad ka jingkam jong u Chairman barim jong ka ANVC(B) u Rimpu Marak ba ki Garo ki dei ban ioh long MDC ha ki ar tylli ki District Council ha KHADC bad JHADC.
Kumba la paw ha ki lad pathai khubor u Chairman barim jong ka ANVC(B) u pyrshah ban weng ia ka ktien “Unrepresented Tribes” na ka Sixth Schedule kaba ka sorkar pdeng kala kwah ban pynkylla, ka jingpyrshah ka jong u ka long ba ki Garo ki dei ban shah thung MDC ha KHADC bad JHADC bad kim don ei ei ban ong lada thung ia u Khasi ha GHADC.
U bah Latiplang, u la ong ba halor ka jingiasoi ka ANVC bad ka sorkar pdeng kata ka dei ka kam ka jong ki bad ka jingpynbun ia ki MDC ha Garo Hills ym don ei ei ban ong, hynrei kam dei ban ktah pat ia ka Khasi Hills.
Haba ia dei bad ki Village Council, u la ong ba ha Khasi bad Jaintia Hills kila don ia ki dorbar hima, dorbar raid bad ki dorbar shnong kumta ym don kam ia ka Village Council katba sha, hynrei sha Garo Hills kata ka dei ka kam ka jong ki ba kin peit.
Na ka liang jong u Bah Latiplang MDC jong ka KHADC u la ong ba kane ka jingkwah ia ka Village Council imat ka don ei ei sha lyndet , lada dei na ka bynta ka jingdawa ia ka Garo Land kan bha tang ba kam dei ban ktah ia u pud u sam wat la ki don ki jaka ba la bun kiwei ki jaidbynriew. Ka KHADC ka don ia u pud u sam katkum ki map jong ki Hima.
